Það er nóg að fylgjast með á næstunni – fyrir þá sem hafa áhuga á hinum pólitíska leik.

Ég geri ekki ráð fyrir að Ragnar Önundarson telji sig geta fellt formann Sjálfstæðisflokksins í Suðvesturkjördæmi. En hann gengur fram af óvenjulegri hreinskilni – segir beinlínis að Bjarni Benediktsson sé óhæfur til að vera formaður flokksins og forsætisráðherra. Af þessu hafa stuðningsmenn Bjarna talsverðar áhyggjur, ein sá ötulasti, Friðjón Friðjónsson, svarar fullum hálsi, minnir á vandræðamál sem Ragnar var viðriðinn og kallar hann höfuðpaurinn í delítunni.

Í Norðausturkjördæmi stendur yfir mikill slagur hjá Framsókn. Helsta von Sigmundar Davíðs Gunnlaugssonar til að sigra Höskuld Þórhallsson virðist felast í því að stillt verði upp á framboðslista á kjördæmisþingi, verði almenn kosning meðal flokksmanna er Höskuldur miklu sigurstranglegri. Samkvæmt skoðanakönnun sem birtist í Vikudegi hefur hann miklu meira fylgi í langfjölmennasta byggðarlaginu, Akureyri. Það yrði mikið áfall fyrir Sigmund að ná ekki fyrsta sætinu sem hann sækist eftir fyrir norðan.

Það sem er mest áberandi í Samfylkingunni er að flestir þingmenn vilja hanga á sæti sínu – og eru líklegir til að ná því. Einna tæpast þykir Sigmundur Ernir Rúnarsson standa í Norðausturkjördæmi. Það hefur verið talað um að Sigmundur færi sig yfir í Betri framtíð, en líklega myndi það reynast hinu nýja framboði dýrkeypt. Róbert Marshall er þegar kominn þangað og strax rætt um að þetta séu flóttamannabúðir frá Samfylkingunni.

Í Suðvesturkjördæmi er slag um fyrsta sæti hjá Samfylkingunni stillt upp eins og þar sé formannskosning milli Árna Páls Árnasonar og Katrínar Júliusdóttur. Það er erfitt að segja hvort er líklegra til að sigra, en hvorugt þeirra getur talist vera sterkt formannsefni fyrir flokkinn.

Svo við víkjum aftur að Sjálfstæðisflokknum. Samkvæmt skoðanakönnun MMR hefur Hanna Birna Kristjánsdóttir mikla yfirburði yfir keppinauti sínum Illuga Gunnarssyni í Reykjavík. 76 prósent segjast treysta Hönnu best til að leiða listann, aðeins 10 prósent Illuga. Þannig bíður mikill pólitískur frami Hönnu Birnu, þótt hún hafi tapað í formannsslag á móti Bjarna. Innan seilingar er fyrsta sætið í Reykjavík – sem þykir óhemju fínt í Sjálfstæðisflokknum – varaformennska í flokknum, kannski feitt ráðherraembætti og hugsanlega formennska í fyllingu tímans.