David Cameron hefur reynt að bera í bætifláka fyrir bankamenn, hann hefur haldið því fram að ekki megi tala illa um svo mikilvæga atvinnugrein.
En nú eru öll þau orð fyrir gíg.
Liborvaxtahneykslið sem nú skekur Bretland sýnir að það er líkt og dregin víglína milli bankanna og almennings.
Ofurgreiðslurnar sem fóru til á þriðja hundrað af stjórnendum Barclays bankans eru ótrúlegar, í samanburði eru skattarnir sem bankinn greiddi afar litlir.
Eins og Aditya Chakrabortty bendir á í Guardian er þetta ekkert annað en skipulagt rán.
Flestir starfsmennirnir sem fá ofurgreiðslurnar starfa í fjárfestingararmi Barclays, BarCap, en það er breska stjórnin sem ber ábyrgð á starfsemi viðskiptabankans Barclays. Þarna eru svo stórar fjárhæðir í húfi að þær gætu sökkt breska hagkerfinu. Það er talað um spilavítiskapítalisma, en Chakrabortty segir að þegar ríkisábyrgðin sé tekin með sé nær að tala um rjómabú en spilavíti. Bankastjórnarnir og hirð þeirra eru ekki að hætta sínum eigin peningum.
