Hér talar ein af grúpíum útrásarinnar. Fyrrum ritstjóri Markaðarins, viðskiptaútgáfu Fréttablaðsins, sem flutti halleljújafréttir af íslenskum viðskiptasnillingum. Aldrei örlaði á gagnrýnni hugsun í Markaðnum. Þeir sem gagnrýndu óhóf útrásarvíkinganna fengu þá einkunn að þeir væru hallærislegir og öfundsjúkir. Það væri þeirra mál hvernig þeir eyddu peningunum sínum.

Það var ekki alvarlegt mál þegar gengi fyrirtækja var stanslaust kjaftað upp í Markaðnum – og líka í sérstökum fréttaaukum á Stöð 2 þar sem Hafliði var fremstur í flokki – en síðan þegar kemur fram almennur borgari úti í bæ og gagnrýnir klabbið, þá er það hið mesta alvörumál.

Þá eru fjölmiðlar að bregðast samkvæmt Hafliða.

Síðar fór Hafliði til starfa hjá REI og var þar í hópi manna sem áttu að fá feita kaupréttarsamninga á síðustu augnablikum útrásarinnar – þegar þeir sáu að ekki var annað eftir en að reyna að seilast í sameiginlegar auðlindir landsmanna.

En við þurfum svosem ekki að horfa lengra en til fyrrverandi yfirboðara Hafliða, Jóns Ásgeirs Jóhannessonar – sem hefur sjálfur sagt að bankarnir séu svo gott sem gjaldþrota. Annar mælikvarði á stöðuna eru svo vangaveltur um að ríkið þurfi að ef til vill að koma bönkunum til bjargar.

Hér eru til glöggvunar nýjar upplýsingar um skuldatryggingarálag íslensku bankanna.