Kannski á maður ekki að trúa neinu sem stendur í blöðunum – sérstaklega ekki í gúrkutíðinni.
Fyrir helgina voru blöðin full af fréttum um að framundan væri algjört hrun á fjármálamörkuðum. Meltdown var það kallað.
Svo rann upp mánudagur og það gerðist eiginlega ekki neitt.
Blöðin hér í Bretlandi hafa líka verið að birta mikið af fréttum um rosalegt neyðarástand sem mun skapast á Heathrow vegna fjölda umhverfissinna sem ætla að mótmæla flugsamgöngum.
Ein sagan var að fólkið myndi skilja eftir torkennilega pakka á víð og dreif um flugstöðina og þannig stöðva allt flug.
En það hefur eiginlega ekkert gerst. Þetta virðist vera lítill friðsamur hópur sem hefst við í tjöldum fyrir utan flugvöllinn.
Um daginn var því slegið upp í götupressunni að Lord Lucan væri fundinn á Nýja-Sjálandi.
Lucan er breskur aðalsmaður sem fyrir mörgum áratugum myrti barnfóstru og hvarf eftir það. Ekkert hefur spurst til hans síðan.
Blöðin birtu myndir af manninum á Nýja-Sjálandi, nokkuð öldruðum umrenningi sem sefur í bíl. Það var haft til marks um að þetta væri Lucan lávarður að hann væri hermannlegur í fasi.
Tveimur dögum síðar fóru að birtast fréttir um að umrenningurinn væri að minnsta kosti tíu árum yngri en Lucan og líklega einum tuttugu sentímetrum styttri.
En af hverju að láta það þvælast fyrir góðri frétt?
