Líklega var atriðið með sjónvarpskonunni Mika Brzezinski ákeðið fyrirfram. Það skiptir samt ekki öllu máli. Hún sagði það sem okkur mörgum finnst um Paris Hilton. Hún gekk fram fyrir skjöldu eins og sagt er. Sagði einfaldlega:

Það er komið nóg af þessu rusli.

Þessi uppákoma speglar vanda fjölmiðla sem vilja taka sig alvarlega. Að undanskildum ríkisfjölmiðlum þurfa þeir að reiða sig á auglýsingar og áskriftir til fjáröflunar. Nýjir miðlar grafa stöðugt undan þeim. Þeir svara með því að fara að líka að elta lið eins og Paris Hilton, Lindsey Lohan, Britney Spears, Pete Doherty og Kate Moss.

Af því þetta er það sem fólkið vill.

Margir blaðamenn hugsa sem svo: Ég fór ekki í þetta fag til að gera þetta.

Nú eru fréttir af því að standi til að leggja niður fréttastofu Stöðvar 2. Hún hefur verið glæsilegt flaggskip fyrirtækisins í tuttugu ár. Hefur sinn status og sínar hefðir. En áskrifendur Stöðvar 2 eru ekki spenntir fyrir henni. Þeir borga til að fá Prison Break og Nip/Tuck. Samkvæmt áhorfskönnunum horfa tryggustu áskrifendurnir ekki mikið á fréttir.

Og þannig er það fyrst og fremst spurning um ímynd, áhrif og virðingu að halda úti fréttastofunni. Fyrirtækið tapar peningum á henni. Þar vinna fréttamenn sem margir mjög góðir í sínu fagi, vandir að virðingu sinni – þeir myndu ekki vilja halda úti fréttastofu þar sem aðallega eru sagðar fréttir af Paris Hilton.

Sem ef til vill er það sem áskrifendur vilja. Eða einhvern veginn held ég að markaðsmennirnir hafi komist að þeirri niðurstöðu.