Það er fyndið þegar ríka og fræga fólkið beinir athyglinni að sjálfu sér með því að taka þátt í uppákomu eins og Live Earth.

Nú er komið í ljós að Madonna, Sting og allt þetta lið er örgustu hræsnarar. Sá sem ferðast í einkaþotu mengar sjötíu sinnum meira en sá sem fer með farþegaflugi. Madonna fjárfestir í olíufyrirtækjum. Guardian segir að auður Stings sé metinn á 185 milljónir punda – en samt er hann að vinna sér inn pening með því að auglýsa afar óumhverfisvænar bifreiðar. Kona hans, snobbkvendið Trudie Styler ferðast áttatíu kílómetra í einkaþyrlu til að fara í samkvæmi.

Á endanum mun þetta leiða til þess að frægir og ríkir keppast um að sýnast umhverfisvænir. Björgólfur og Jón Ásgeir munu selja einkaþoturnar.

Áhrif Live Earth verða semsagt mikil og að sumu leyti ófyrirséð.

— — —

Samkvæmt frétt á vef BBC í morgun er búið að hrekja þá kenningu að það sé sólin sem valdi hlýnun jarðar. Þetta var ein aðalröksemdin í myndinni The Great Global Warming Swindle. Þvert á móti segir að sólin sé afkastaminni en hún var fyrir tuttugu árum.

Ef við hugleiðum pláneturnar í kringum okkur, hvað þær eru óbyggilegar vegna hita, kulda eða vinda – þá er kannski ekki ýkja erfitt að gera sér í hugarlund hversu lofthjúpurinn og veðrakerfið á jörðinni er viðkvæmt.

Eða viljum við kannski ekki skilja?