Sérstakur gestur í Kiljunni á miðvikudagskvöld er ítalski rithöfundurinn Claudio Magris. Magris, sem er fæddur 1939, var sterklega orðaður við Nóbelsverðlaunin í bókmenntum fyrr í mánuðinum. Hann er höfundur mikilla skáldverka, en í skáldsögunni Alla cieca sem kom út fyrir tveimur árum fjallar hann um persónu sem Íslendingum er afar hjartfólgin, ævintýramanninn Jörund hundadagakonung.
Í þættinum verður einnig fjallað um nýja skáldsögu Gyrðis Elíassonar, Biblíuþýðinguna nýju, ljóðabókina Öskudaga eftir Ara Jóhannesson sem hlaut bókmenntaverðlaun Tómasar Guðmundssonar í síðustu viku og bókina Velkomin til Bagdad eftir Davíð Loga Sigurðsson.
Páll og Kolbrún eru á sínum stað, sem og Bragi Kristjónsson, en Páll Óskar Hjálmtýsson velur uppáhaldsbók sína.