Matthías Johannessen, skáld og fyrrverandi ritstjóri, verður sérstakur gestur í Kiljunni á miðvikudagskvöld. Í þættinum ræðir Matthías um skáldskapinn, stjórnmálin, blaðamennskuna og internetið.
Í þættinum koma einnig fram skáld af nýafstaðinni ljóðahátíð Nýhils. Kristín Ingólfsdóttir háskólarektor velur uppáhaldsbók sína.
Einnig verður fjallað um nýja nóbelsverðlaunahafann Doris Lessing, en Bragi Kristjónsson segir frá Huldudreng Ingimundar fiðlu, bróður Kjarvals.
Af öðrum bókum sem verður rætt um í þættinum má nefna nýja ævisögu Leni Riefensthal, nýja spennusögu eftir Árna Þórarinsson og tvær blaðamannabækur, Velkominn til Bagdad eftir Davíð Loga Sigurðsson og Fjölmiðla 2006 eftir Ólaf Teit Guðnason.