Margrét Sverrisdóttir verður í þeirri einstæðu stöðu í borgarstjórn að hafa ekkert stjórnmálaafl á bak við sig. Samt hlýtur hún næstmestu virðingarstöðuna í borginni – verður forseti borgarstjórnarinnar.
Margrét er kosin í borgarstjórnina af lista Frjálslyndra, flokks sem hún starfar ekki lengur í. Hún bauð sig fram til þings í nafni Íslandshreyfingarinnar. Sá flokkur á auðvitað enga aðild að borgarstjórninni þótt Margrét sé þar– auk þess sem er erfitt að hugsa sér að lífsmark verði í Íslandshreyfingunni miklu lengur.
Svo er það spurning um Ólaf F. Magnússon sem í rauninni á sætið sem Margrét situr í. Er von á honum aftur í borgarstjórnina? Hvenær þá? Hversu veikur er Ólafur? Borgarbúar eiga að vissu leyti rétt á að vita það.
Nýi meirihlutinn er sérkennilega samansettur. Er þessi hópur fólks yfirleitt sammála um eitthvað? Þau eru augljóslega ekki sammála um málefni REI – málið sem gamla borgarstjórnin sprakk á. Nú síðast hafði Svandís ekki aðra tillögu en að „róa umræðuna“.
Maður sem hélt að það væri einmitt í anda VG að borgarbúar hefðu sjálfir skoðanir á stórum málum sem þá varða.
Flokkarnir eru tæplega samstiga hvað varðar niðurrif gamalla húsa. Þetta eru fyrirætlanir frá tíma R-listans – baráttan gegn þessu var eitt aðal kosningamál Frjálslyndra.
Frjálslyndir börðust líka hatrammlega gegn hugmyndum um að flugvöllurinn færi úr Vatnsmýri. Það fyrsta sem Dagur sagði á fundi Samfylkingarinnar dag er að flugvöllurinn þurfi að fara.
Hvað skoðun hefur Margrét á því? Eða Ólafur F?
