Einhvern veginn hef ég á tilfinningunni að borgarstjórnarfundir séu stundum hálf leiðinlegar samkomur. Á myndum sem ég sá úr borgarstjórn í sjónvarpinu um daginn virðast sumir borgarfulltrúarnir vera sofandi en Björk Vilhelmsdóttir sat og prjónaði.
Mamma mín sem var kennari í marga áratugi sagði að fátt þyldi hún verr en þegar nemendur prjónuðu í tíma.
En borgarstjórnarfundurinn á morgun ætti að verða öðruvísi. Verulega spennandi. Ég sé að ungliðar úr andstöðuflokkunum i borgarstjórn er að hvetja fólk til að mæta á pallana. Það verður kannski ekki stemming eins og í Gúttóslagnum þegar fætur voru rifnir undan stólum og þeir notaðir sem barefli, en þetta ætti að verða sögulegur fundur – aðalleikendurnir í málinu verða metnir eftir frammistöðu sinni á honum.
REI málið hefur aldeilis undið upp á sig. Í gær virtist um tíma eins og það væri að renna út í sandinn. Nú er einkum tekist á um þrennt: Trúverðugleika borgarstjóra og sannsögli; hvort vit sé að selja hlut Orkuveitunnar í REI, hversu mikla hreinstefnu menn aðhyllast í því efni; og svo eru það innanflokksátökin í Sjálfstæðisflokknum sem krauma undir. Maður skyldi ekki vanmeta hvað þau eru alvarleg.