Morgunblaðið birti á sunnudag athyglisverða grein þar sem rætt er við skiptinema við Háskóla Íslands. Það er merkilegt að lesa hvað þetta unga fólk hefur að segja um Ísland – það er nefnilega ekki allt jákvætt.

„Líklega er of langt gengið að tala um útlendingahatur. Útlendingaóvild er nær lagi,“ segir Katharina Lena Gross frá Þýskalandi.

Hún bætir við:

„Ég hef hitt margt gott fólk og mér líður orðið mjög vel hérna. Það kom mér þó á óvart hversu algengt er að Íslendingar komi illa fram við útlendinga.“

Hún hefur ekki góða sögu að segja af húsnæðismarkaðnum hérna. Í greininni segir:

„Starfsfólk Háskólans benti henni á tvær íbúðir til leigu. Önnur var án baðherbergis og eldhúss, undir súð og þar að auki fokdýr. Hin var ókláruð, gluggalaus og deila þurfti baðherbergi og eldhúsi með fleiri en tíu öðrum leigjendum.“

Um námið í Háskóla Íslands segir þessi unga kona frá Þýskalandi:

„Það var eins og enginn vissi hvað ætti að gera við okkur skiptinemana. Okkur fannst við ekki velkomin og enginn virtist hafa áhuga á okkur.“

Ella Kolliokoski frá Finnlandi segir að það sé mjög erfitt að kynnast Íslendingum.

„Ég hef eiginlega bara kynnst öðrum skiptinemum,“ segir hún.

Ellu finnst Íslendingar hafa litla umhverfisvitund og furðar sig á hversu lítið er endurunnið hérna:

„Mér finnst skrítið að allir eigi bíl. Ef maður fylgist með umferðinni sér maður að það eru eiginlega alltaf bara einn eða tveir í hverjum bíl. Það finnst mér ekki rétt. Strætisvagnakerfið er heldur ekki nógu gott.“

Carl Mikael A. Teglund frá Svíþjóð er ánægður, finnst landið flott, en segir að Íslendingar vinni of mikið:

„Ég hef t.d. tekið eftir því að það er mjög erfitt að skipuleggja ferðalög og matarboð með Íslendingum af því að þeir eru alltaf að vinna.“

Hann hefur líka áhyggjur af því hvernig Íslendingar ætli að taka á móti öllum þeim fjölda útlendinga sem hingað kemur:

„Ég velti því samt fyrir mér hvað gerist þegar fleiri útlendingar koma hingað. Ef þið farið ekki að búa ykkur undir það og ákveða hvernig þið ætlið að bregðast við þá verður þetta helsta vandamál Íslendinga á næstu árum… M.a. er mikilvægt að koma í veg fyrir að hér myndist gettó og að útlendingar sem hingað koma einangrist.“