Baugsmenn hafa farið mjög klaufalega að í mótmælum sínum gegn umfjöllun í Kastljósinu. Í fyrsta lagi var enginn að taka eftir umfjölluninni, hún fór fram á mesta góðviðrisdegi ársins – það kveikti í rauninni enginn á þessu fyrr en Baugur fór að kvarta. Í öðru lagi er ekki gott að tapa kúlinu með þessum hætti. Viðbrögðin eru fátkennd.
Á sama hátt hefði Hreinn Loftsson átt að láta orð Sveins Andra Sveinssonar um mögulega refsingu í dómsmálinu sem vind um eyru þjóta. Hann gerði ekki annað en að ljá þeim vængi sem þau hafa flogið á síðan.
Hitt er líka ljóst að Baugsmenn hafa fjallað um ákærur á hendur sér í fjölmiðlum fram og til baka. Þeir hafa skrifað og talað, fengið innlenda og erlenda álitsgjafa til að tjá sig – og stundum beitt fjölmiðlaveldi sínu. Þeir geta ekki ákveðið einhliða að ekki skuli rætt um málið í fjölmiðlum – eftir að hafa sjálfir rekið það á þeim vettvangi.
Nú skilst manni að þetta hafi vakið athygli í Danmörku þar sem menn bíða spenntir eftir útkomu hins nýja Nyhedsblad. Þar spyrst þetta svona út: Þeir vilja ekki bara ráða þessum sextíu prósentum sem þeir stjórna í íslenskum fjölmiðlum, heldur líka öllum hinum fjölmiðlunum.
— — —
Þáttur Morgunblaðsins er mjög skrítinn. Enginn fjölmiðill getur verið jafn klikk og Mogginn. Hann fjallar ekki efnislega um Baugsmálið sjálfur – birti reyndar ákærurnar orðréttar á mörgum blaðsíðum- en prentar svo dag eftir dag nákvæma endursögn af Kastljósinu. Og sýnir deilunum í kringum það sérkennilega mikinn áhuga. Þetta er skrítin blaðamennska.
— — —-
Í gær skrifaði ég að Reykjavík gæti ekki talist fögur borg. Hollvinur síðunnar sendi mér eftirfarandi orðsendingu:
Davíð Oddsson segir stundumþá sögu að þegar hann tók á móti erlendum gestum sem borgarstjóri hafi þeir oftar en ekki horft skilningsríkum augum á hann og sagt:
"Reykjavík hlýtur að hafa orðið fyrir svakalegu sprengjuregni í heimsstyrjöldinni."
Hann mótmælti ekki alltaf.
— — —
Kapítalið þekkir engin landamæri og er ekki þjóðhollt. Sjaldan hefur þetta sést betur en í framferði lyfjafyrirtækisins Actavis sem selur lyf á tíföldu verði á Íslandi miðað við það sem það gerir í Danmörku.
— — —
À propos Sylvía Nótt: Það er kvartað undan því að hún syngi "fuck". Kannski er það ekki svo slæmt. Hugsanlega verða allir farnir að syngja "fuck" í Evróvision eftir nokkur ár. Það væri eftir öðru.
Guðlastið er kannski verra. Ég setti mig í spor guðhræddrar grískrar konu sem hlustar á þetta – og leist ekki á blikuna.
