Jamie Carragher, goðsögn Liverpool, er afskaplega hrifinn af miðjumanninum Declan Rice sem spilar með Arsenal.

Rice átti magnaðan leik fyrir Arsenal í miðri viku er liðið vann 3-0 sigur á Real Madrid í fyrri leik liðanna í átta liða úrslitum Meistaradeildarinnar – hann skoraði tvö mörk beint úr aukaspyrnu.

Carragher segir að það sé óréttlátt að gagnrýna Rice fyrir framlagið fram á við og að hann sé svipaður leikmaður og Roy Keane, goðsögn Manchester United sem spilaði í ‘sexunni’ á sínum tíma.

,,Ég hef alltaf sagt það að Rice sé með gæðin til að skrá sig í sögubækurnar fyrir England og hann hefur sýnt af hverju,“ sagði Carragher.

,,Það er of oft sem hann er gagnrýndur fyrir að skora ekki nóg eða leggja ekki upp en það er ekki það sem hann gerir best.“

,,Hann er ekki að spila í sömu stöðu og Frank Lampard og Steven Gerrard gerðu á sínum tíma. Rice er meira eins og Roy Keane sem skoraði 57 mörk í 473 leikjum fyrir félagslið.“