Slysið varð um miðjan dag í gær að staðartíma, en um borð í þyrlunni voru hjónin Agustín Escobar og Merce Montal auk þriggja ungra barna þeirra. Flugmaðurinn sem lést var 36 ára.
Agustín var forstjóri raftækjaframleiðandans Siemens á Spáni og hafði fjölskyldan flogið frá Barcelona til New York í gærmorgun til að skoða borgina. Eitt þeirra fyrsta verk eftir komuna var að fara í útsýnisferð yfir borgina sem endaði með fyrrgreindum afleiðingum.
Myndband sem sýnir slysið þykir varpa ákveðnu ljósi á hvað gerðist, en talið er að þyrluspaði hafi losnað með þeim afleiðingum að hann klippti stél vélarinnar í sundur.
Þessari kenningu varpar Jim Brauchle, lögfræðingur og fyrrverandi herflugmaður, fram í viðtali við DailyMail.com. Hann hefur áður tekið að sér mál aðstandenda fórnarlamba sambærilegra slysa í New York.
Á myndbandinu sést spaðinn hringsnúast í loftinu og lenda í ánni skömmu eftir að þyrlan brotlenti.
Michael Roth, eigandi fyrirtækisins sem sér um þyrluflugið, segir að flugmaðurinn hafi látið vita að eldsneyti væri af skornum skammti. „Hann sagðist þurfa að lenda þar sem hann vantaði eldsneyti og það hefði átt að taka hann þrjár mínútur að koma inn. En 20 mínútum síðar var hann ekki kominn,“ segir hann.
Hann tekur undir kenningu Jims um orsök slyssins en tekur þó fram að rannsókn þurfi að fara fram á slysinu.
Myndir voru teknar af fjölskyldunni rétt áður en hún steig upp í þyrluna og á henni má sjá hjónin brosandi ásamt þremur börnum sínum. Vélin hafði verið í loftinu í um sextán mínútur áður en hún brotlenti.
