Donna Elkins, sem er 59 ára, var nýlega handtekin fyrir að hafa beint byssu að tveimur unglingum, 13 og 15 ára, og að hafa hótað að skjóta hausinn af þeim. Ástæðan fyrir þessu var að hún var ósátt við það sem unglingarnir gerðu í garðinum hennar. Elkins er einnig grunuð um að hafa logið til um hvað unglingarnir gerðu.

ClickOrlando.com segir að lögreglumenn í Brevard County hafi verið sendir að heimili Elkins eftir að hún hringdi í neyðarlínuna og sagði tvo unglingspilta hafa verið við veiðar í garðinum hennar.

Þegar lögreglan kom á vettvang sagði Elkins að hún hafi „handsamað“ piltana og að þær lægju í grasinu.

Þegar rætt var við piltana sögðu þeir að Elkins hefði ógnað þeim með byssu þegar hún kom að þeim við veiðar í tjörn í garðinum hennar. Sögðust þeir hafa óttast um líf sitt og hafi haldið að Elkins myndi vinna þeim mein. Þeir sögðu að hún hafi síðan skipað þeim að leggjast niður og hafi sagt þeim að þeir fengju ekki að fara á brott.

Vitni sögðu lögreglunni að piltarnir hefðu verið látnir liggja á jörðinni í fimm mínútur áður en eiginmaður Elkins kom og afvopnaði hana.

Rannsókn lögreglunnar leiddi í ljós að piltarnir höfðu ekki verið í garðinum hennar heldur á landareign í eigu sveitarfélagsins. Voru piltarnir nokkra metra frá lóð Elkins.

Á upptöku, sem faðir annars piltanna, lét ClickOrlando.com í té, heyrist Elkins segja piltunum að ef einhver fari inn í garðinn hennar þá „megi skjóta hausinn af þeim“. „Ég hef rétt til að verja landareign mína og hús,“ sagði hún einnig.

Hún var látin laus gegn 25.000 dollara tryggingu.