Arnar Gunnlaugsson, þjálfari íslenska karlalandsliðsins í fótbolta, fór á kostum í Vikunni með Gísla Marteini á RÚV fyrir helgi og afhjúpaði til að mynda leyndarmál, eins og hann orðaði það.

Eins og gjarnan var farið um víðan völl í þessum geysivinsæla spjallþætti og ræddi Arnar það meðal annars þegar hann tók þátt í hinni fornfrægu Freestyle-keppni í Tónabæ seint á níunda áratugnum.

„Nú er ég að segja ykkur leyndarmál og vona að þetta sé „circle of trust,“ eða er nokkur að horfa á þennan þátt?“ sagði Arnar og uppskar mikinn hlátur viðstaddra, áður en hann hélt áfram.

„Ég var í þriðja sæti í danskeppni, freestyle í Tónabæ. En ég verð að viðurkenna, við vorum fimm strákar og fimm stelpur og ég í rauninni bara stóð og stelpurnar voru að standa í kringum okkur. En ég var hluti af þessu er það ekki?“ sagði Arnar léttur.

Hann fór svo nánar út í þetta og sagði til að mynda af hópurinn hafi komið ofan af Akranesi og hann hafi tekið þátt árið 1989.

„Þetta er svokallaður moli,“ sagði Gísli Marteinn og hafði klárlega gaman að frásögn Arnars.