Það eru margir farnir að kannast við nafnið Jason Tindall en hann er 47 ára gamall og starfar fyrir enska stórliðið Newcastle.

Tindall er aðstoðarmaður Eddie Howe hjá Newcastle og er gríðarlega líflegur á hliðarlínunni – það eru fáir sem öskra meira en Tindall í leikjum Newcastle.

Hann er kallaður ‘Mad Dog’ af mörgum á Englandi og fer oft yfir strikið og þurfa dómarar í kjölfarið að stíga inn í.

Tindall segist einfaldlega vera fullur af ástríðu og þvertekur fyrir það að hann sé athyglissjúkur eða að hann sé að reyna að vekja einhvers konar athygli á sjálfum sér.

,,Ég veit ekki nákvæmlega hvað þetta ‘Mad Dog’ gælunafn er eða hvaðan það kom. Þetta tengist því örugglega hvernig ég læt á hliðarlínunni,“ sagði Tindall.

,,Ég er mjög ástríðufullur og ég mun gera allt sem ég get til að vinna mína leiki og það er góður hlutur. Eddie er ekki mjög tilfinningaríkur á hliðarlínunni og ég held að það sé mikilvægt að ég sé eins og ég er.“

,,Mér er drullusama hvað fólki finnst. Ég er ekki að reyna að vekja neina athygli á mér, það hefur aldrei verið tilgangurinn.“

,,Fólk segir að ég spili mig of stóran fyrir aðstoðarþjálfara en ég hugsa ekkert út í þetta eða þessa athygli sem þið talið um. Ég er bara eins og ég er.“