Genesis Thomas, sem er nemandi í Mann grunnskólanum á Long Beach í Kaliforníu, stóð sig svo sannarlega vel við fjársöfnun fyrir skólann. Hún safnaði 160 dollurum og fékk verðlaun frá skólanum fyrir frammistöðuna.

En fjölskyldu hennar þótti verðlaunin ansi óviðeigandi en um leikfangaapa, klósett og plastkúk var að ræða.

Frændi hennar, Craig Polk, sagði í samtali við Fox 11 að þessi verðlaun væru óviðeigandi: „Bandaríkjamenn af afrískum uppruna hafa oft verið kallaðir apar í gegnum tíðina og það að láta hana fá apa í verðlaun . . . það er óásættanlegt, bara óásættanlegt.“

Fjölskyldan vill fá afsökunarbeiðni frá skólanum og að starfsfólk hans verði látið sækja viðeigandi námskeið svo atburður af þessu tagi endurtaki sig ekki.

Skólinn er í hinu fína Belmont Heights hverfi og eru um 4% nemendanna svartir.

Ekki liggur fyrir hvort Genesis var eini nemandinn sem fékk verðlaun af þessu tagi.