Þó að Danny sé á lífi mun hann ávallt þurfa að reiða sig á aðstoð annarra við daglegar athafnir þar sem hann er blindur, lamaður og ófær um að tjá sig.
Innvígsluathafnir í bræðralög í bandarískum háskólum má líkja við busavígslur sem þekkst hafa hér á landi, en athafnirnar eru þó mun grófari og hættulegri og snúast jafnvel um andlegt ofbeldi og niðurlægingu. Danny fékk lífshættulega áfengiseitrun kvöld eitt í október 2021 þegar komið var að lokakaflanum í innvígsluathöfninni.
Daily Mail fjallaði ítarlega um þetta mál í vikunni og ræddi meðal annars við móður Danny og lögfræðing fjölskyldunnar sem hefur tekið að sér fjölmörg sambærileg mál.
Danny var nýnemi í skólanum þegar atvikið varð og hafði hann fengið boð um að ganga til liðs við bræðralagið Phi Gamma Delta. Hann vildi eignast vini í skólanum og var tilbúinn að leggja ýmislegt á sig til að komast inn í bræðralagið. Hann sinnti ýmsum verkum fyrir meðlimi hópsins, sótti pizzur og þreif herbergin þeirra svo dæmi séu tekin.
En áður en hann gat orðið fullgildur meðlimur þurfti hann að leggja á sig ákveðið lokaverkefni sem fólst í því að drekka gríðarlegt magn áfengis.
Eldri meðlimur bræðralagsins, Ryan Delanty, svokallaður Pledge Dad, lét flösku sem innihélt einn lítra af vodka í aðra hönd hans sem hann límdi fasta við lófann. Var Danny gert að klára úr flöskunni. Eðli málsins samkvæmt varð Danny mjög drukkinn og þegar hann hafði klárað úr flöskunni leið hann út af. Meðlimir hópsins lögðu hann í sófa en áttuðu sig ekki á því fyrr en of seint að Danny var kominn með lífshættulega áfengiseitrun.
Þegar þeir áttuðu sig á því að ekki væri allt með felldu var honum ekið á sjúkrahús þar sem hann var lagður inn á gjörgæsludeild. Þar dvaldi hann í nokkrar vikur og var um tíma tvísýnt hvort hann myndi lifa af. Sem fyrr segir er Danny lamaður fyrir lífstíð eftir atvikið, blindur, ófær um að tjá sig og þarf aðstoð allan sólarhringinn.
David Bianchi, lögmaður fjölskyldunnar, segir í viðtali við Daily Mail að hann hafi tekið að sér fjölmörg sambærileg mál en þetta sé það versta sem hann hafi fengist við á sínum ferli. Bendir hann á að meðlimir bræðralagsins hafi verið á skilorði þegar atvikið varð, eftir að kvartað hafði verið undan hegðun bræðralagsins og notkun þeirra á áfengi ári áður.
Innvígsluathafnir sem þessar eru bannaðar í flestum, ef ekki öllum, háskólum Bandaríkjanna, og í sumum ríkjum eru þær bannaðar með lögum. Vandamálið er stundum það að þessar athafnir fara fram í leyni, og þátttakendur þora ekki að segja frá af ótta við hefnd eða útilokun.
Bianchi segir að það óvenjulega við mál Dannys sé sú staðreynd að öll atburðarásin náðist á myndband.
Alls var tuttugu meðlimum bræðralagsins stefnt vegna málsins og voru ellefu þeirra dæmdir. Þyngsta dóminn fékk fyrrnefndur Delanty, sex mánaða fangelsi og sex mánuði til viðbótar í stofufangelsi.
Í viðtalinu segir móðir Danny, Mary Pat Santulli, að hún sé reiðust yfir því að enginn hafi hringt á neyðarlínuna þegar ljóst var að ekki væri allt með felldu. Þá hafi enginn beðist afsökunar. Með því að bregðast fyrr við hefði verið hægt að koma í veg fyrir að svona illa færi. Bendir hún á að varir hans hafi verið orðnar bláar og hann alveg meðvitundarlaus þegar meðlimir bræðralagsins fóru með hann á sjúkrahús þar sem hann fór í hjartastopp stuttu síðar.
Nú, fjórum árum eftir atvikið, segir Mary að Danny heyri vel en hún gerir sér ekki alveg grein fyrir því hvort hann viti hvað gerðist. „Það koma augnablik þar sem það koma tár þannig að við viljum ekki tala um það sem gerðist fyrir framan hann. Kannski er eitthvað að rifjast upp fyrir honum. Við vitum það ekki.“
