Maður í Flórída í Bandaríkjunum hefur verið handtekinn fyrir hótanir í garð Donald Trump forseta Bandaríkjanna en meðal þeirra var að skora á forsetann í slag þar sem þeir yrðu báðir naktir og slegist yrði þar til annar þeirra lægi látinn eftir.
Samkvæmt umfjöllun New York Post heitir maðurinn Aaron Todd og er 42 ára gamall en hann var handtekinn eftir að hafa birt hótanir sínar á samfélagsmiðlum.
Birti hann 80 sekúnda myndband með hótunum sínum en í myndbandinu sagði hann einnig að vegna Trump hvíldi bölvun á hverri manneskju í heiminum og að forsetinn væri andkristur sjálfur.
Lífvarðasveit forsetans varð fljólteg vör við myndbandið og löggæsluyfirvöldum á svæðinu var gert viðvart. Fógetinn í sýslunni þar sem Todd býr sagði myndbandið strax hafa vakið áhyggjur í ljósi fyrri banatilræða við Trump og því hafi ekki þótt annað hægt en að bregðast við af fullri hörku.
Lögð hefur verið fram ákæra á hendur Todd en hann verður látinn laus úr fangelsi á meðan málið er til meðferðar gegn því að 500.000 dollara trygging (66,7 milljónir íslenskra króna) verði lögð fram.
