Miklar deilur hafa geisað innan Sósíalistaflokks Íslands undanfarna daga og hafa deilurnar m.a. farið fram fyrir opnum tjöldum í netheimum. Í færslu í opnum spjallhópi flokksins á Facebook kvartar maður nokkur yfir skorti á svörum frá Gunnari Smára Egilssyni sem hefur setið undir þungri gagnrýni flokksfólks. Sanna Magdalena Mörtudóttir oddviti flokksins til borgarstjórnar segir ekki eðlilegt að krefjast svara á laugardögum en óhætt er að segja að sú athugasemd hennar fái misjafnar undirtektir.
Upphaf deilnanna má rekja til úrsagnar Karls Héðins Kristjánssonar forseta ungliðahreyfingar Sósíalista úr kosningastjórn flokksins. Sakaði hann Gunnar Smára sem hefur verið einn helsti og mest áberandi forystumaður flokksins um skort á samráði og að hunsa lýðræðislega gagnrýni.
Í færslu sem skrifuð var í opinn spjallhóp flokksfólks á Facebook í gærkvöldi er kvartað yfir því að Gunnar Smári hafi ekki svarað pósti þar sem spurt var hvenær aðalfundur Alþýðufélagsins yrði og hvar væri hægt að nálgast samþykktir þess. Alþýðufélagið er félag sem tengist flokknum en það sér m.a. um rekstur Samstöðvarinnar. Kvartaði málshefjandi yfir skorti á svörum frá Gunnari Smára við spurningum sínum ekki síst í ljósi þess að hann hafi greiðlega svarað pósti annars manns sem sendur hafi verið seinna en sá póstur hafi snúist um gervigreind og geimflaugar.
Trausti Breiðfjörð Magnússon fyrrum borgarfulltrúi Sósíalistaflokksins hefur einnig stigið fram og kvartað undan Gunnari Smára og slælegum viðbrögðum Sönnu Magdalenu við kvörtunum hans:
Trausti sár út í Sönnu – „Mér fannst eins og þú tækir ekki mark á því sem ég væri að segja“
Trausti tekur í athugasemd við færsluna heilshugar undir kvartanir vegna skorts á svörum frá Gunnari Smára um málefni Alþýðufélagsins:
„Karl Héðinn var einu sinni svo heppinn að frétta að aðalfundur væri á döfinni, og ákvað að mæta. Því var vægast sagt tekið mjög illa af stjórninni (lesist Gunnari Smára). Viðmótið var eins og hann væri boðflenna. Sagt að hann ætti ekki heima þarna og var bannað að bjóða sig fram til stjórnar. Á sama tíma var svo stjórn kosin sem var ekki á svæðinu, og hefur aldrei starfað innan Alþýðufélagsins.
Það er sérstakt að fjölmiðill sem gefur sig út fyrir að vera„í eigu allra hlustenda“ taki svona á móti þeim sem hlusta og styðja við stöðina með fjárframlögum. Þeir sem „eiga“ stöðina mega fyrir utan þetta ekki einu sinni frétta af því hvenær aðalfundir eru haldnir. Galið.“
Í athugasemd segir Sanna Magdalena að það sé hins vegar of langt gengið að krefjast svara að kvöldi til á laugardegi:
„Kæru félagar, ef við viljum vinna gegn óhóflegu vinnuálagi, þá byrjum við kannski á því að vera ekki að krefja félaga um svör á laugardagskvöldi.“
Í athugasemdum fá þessi orð Sönnu bæði dræmar undirtektir en aðrir taka undir þau:
„Góða besta, þið hafið val.“
„Með fullri virðingu, en var þetta laugardagskvöld ekki bara laugardagurinn eftir að hafa margsinnis reynt að fá svör og samtal??“
„Af einskærri forvitni. Hvenær er betri tími ? Eftir vinnu á virkum dögum ? Á vinnutíma ? Bara á daginn um helgar ? Furðulegt comment.“
