Út er komið lagið Svo til með Latínudeildinni (Latin Faculty) og Rebekku Blöndal.

Lagið er fyrsti singull eða einstak af væntanlegri breiðskífu Latínudeildarinnar sem bera mun heitið Í hangsinu og mun innihalda djass (handa þeim sem  alla jafna hlusta ekki á djass), blús, bossnóva og fönk. Útgáfa verður að líkindum síðar á árinu eða snemma 2026.

Lagið er í þremur útfærslum á þessari nýju plötu, á íslensku, með enskum  texta, So Nice, og eingöngu leikið, So Nice (Instrumental). Ingvi Þór Kormáksson samdi lagið og enska textann en íslenski textinn er eftir Rebekku.

Enska útgáfan, So Nice, sem mun koma út á safnplötu frá W.O.A. Entertainment í mars eða apríl, er þegar víða á spilunarlistum tónlistarveitna og í spilun á erlendum útvarpsstöðvum, ekki síst í Brasilíu, en þar hefur dagskrárgerðarfólk tekið laginu fagnandi.

Eftir Ingva liggja á þriðja hundrað útgefin lög á ýmsum plötum; meðal annars með JJ Soul Band, Ljóðabroti, Veitunni og Latínudeildinni, sem kallast Latin Faculty  á ensku þegar um er að ræða leiknar útgáfur og enska texta. Ingvi hefur hlotið ýmis verðlaun og viðurkenningar erlendis fyrir lagasmíðar.

Rebekka Blöndal er djasssöngkona og söngkennari, tilnefnd til Íslensku  tónlistarverðlaunanna í ár eins og oft áður.