Trausti Breiðfjörð Magnússon, fyrrverandi borgarfulltrúi Sósíalista, segir að Sanna Magdalena Mörtudóttir, oddviti flokksins, hafi hundsað ábendingar frá honum vegna Gunnars Smára Egilssonar, stofnanda og formanns framkvæmdastjórnar flokksins.

Trausti steig fram í gær á Facebook-síðu flokksins þar sem hann greindi frá því að framkoma Gunnars Smára hefði haft áhrif á þá ákvörðun hans að segja af sér sem borgarfulltrúi flokksins í september í fyrra. Áður hafði komið fram að hann hefði glímt við erfið veikindi og þyrfti að setja heilsuna í forgang.

Segir hann ítrekað hafa skipt sér af

Í pistli sínum, sem DV fjallaði um í gær, sagði hann meðal annars:

„Gunnar Smári var ítrekað að skipta sér af mínum störfum og Sönnu. Hann sendi okkur skilaboð þar sem hann meðal annars sagði okkur að hætta að ræða svona mikið um myndavélamálið í borginni, sem snerist um að fjölga ætti öryggismyndavélum í Reykjavík – mál sem ég barðist sérstaklega gegn af persónuverndarástæðum. Það leiddi meðal annars til þess að meirihlutinn þurfti að draga tillögurnar í land og gera úrbætur. Hann setti líka út á að við værum að berjast gegn einkavæðingu ljósleiðarans. Það væri „veikt“.“

Sjá einnig: Trausti getur ekki þagað lengur og lýsir framkomu Gunnar Smára í sinn garð – „Þegar ég lít til baka sé ég hvernig þetta virkaði“

Trausti nefndi fleiri atriði í færslu sinni, til dæmis óraunhæfar kröfur og endalausa pressu. „Álagið var mjög mikið. Ég var harðduglegur og var líka að búa til þætti með Sönnu. Á mínum tíma sem borgarfulltrúi lagði ég um 3 milljónir króna af launum mínum til Vorstjörnunnar, samtaka sem eiga að styðja við hagsmunabaráttu almennings. Ég upplifði aldrei neinn stuðning eða þakklæti frá formanninum – heldur var krafan alltaf sú að maður þyrfti að gera meira.”

„Ég kannast ekki við þau“

Sanna Magdalena Mörtudóttir tjáði sig undir færslu Trausta þar sem hún sagði meðal annars:

„Þetta er ekki gott að lesa. Hvaða skilaboð eru þetta? Ég kannast ekki við þau: „Hann sendi okkur skilaboð þar sem hann meðal annars sagði okkur að hætta að ræða svona mikið um myndavélamálið í borginni, sem snerist um að fjölga ætti öryggismyndavélum í Reykjavík“. Man að þú og ég töluðum rosalega mikið um þetta á vettvangi borgarinnar.”

Segir Sönnu hafa hundsað ábendingarnar

Trausti svaraði því til að hann hefði sagt henni hvernig framkoma hans væri.

„Ekki í jafnmiklum smáatriðum og hér, en ég lét þig vita að framkoma hans væri fráhrindandi. Þetta var nokkrum vikum áður en ég ákvað að biðjast lausnar úr borgarstjórn. Mér fannst eins og þú tækir ekki mark á því sem ég væri að segja þá. Og það er tilfinning fleira fólks sem hefur sagt þér frá einelti sem það hefur orðið fyrir. Eins og þú hundsir ábendingarnar, segir kannski að þetta sé nú leiðinlegt, en stendur samt áfram með honum. Það sárnar mér. Varðandi skilaboðin, þá hef ég ekki áhuga á því að grafa þau sérstaklega upp. Ég man að hann sagði þetta og talaði um þetta. Fleiri félagar geta staðfest að hann talaði um þetta við þá líka. Að hann vildi ekki að við værum að pæla í þessu máli,“ segir Trausti.

Sanna hefur ekki svarað þessum orðum Trausta en Sæþór Benjamín Randalsson, fulltrúi í framkvæmdastjórn flokksins, þar sem Gunnar Smári er formaður, tekur undir orð Trausta. Beinir hann orðum sínum til Sönnu og segir: „Ég minnist þess að Trausti trúði mér oft á sínum tíma sem borgarfulltrúi um einmitt þetta mál. Mér finnst þessi vitnisburður trúverðugur því ég man eftir neyð hans á þeim tíma.“