Lögregluyfirvöld í Japan hafa handtekið hóp karlmanna sem grunaðir eru um skelfileg kynferðisbrot gegn barnungum dætrum sínum. Eru mennirnir sagðir hafa myndað brot sín og deilt þeim sín á milli.

Í umfjöllun Mail Online kemur fram að lögregla hafi ekki tjáð sig um handtökurnar, en fréttamiðlar á borð við The Kyodo News Agency og NHK hafi fjallað um þær.

Munu mennirnir vera á fertugs, fimmtugs- og sextugsaldri og beindust brotin gegn stúlkum á aldrinum 6 til 14 ára.

Í fréttum japanskra fjölmiðla kemur fram að lögregla hafi komist á snoðir um málið þegar einn úr hópnum var handtekinn í nóvembermánuði vegna gruns um kynferðisbrot. Lögregla lagði hald á síma mannsins og fundust þá umrædd samskipti.