Sjötugur karlmaður hefur verið ákærður fyrir að draga að sér rúmlega fjörtíu milljónir króna úr dánarbúi móður sinnar, þar af millifærði hann fimm milljónir króna inn á bankareikning dóttur sinnar, árið 2021, sem þá var 18 ára að aldri.

Í ákæru Héraðssaksóknara á hendur manninum segir að hann hafi verið ákærður fyrir fjárdrátt, en til vara umboðssvik, með því að hafa misnotað aðstöðu sína sem umboðsmaður erfingja í einkaskiptum á dánarbúinu. Hann og yngri bróðir hans eru erfingjar móðurinnar.

Þá eru listuð upp sjö tilvik, hið fyrsta 3. júní 2019 og hið síðasta 26.apríl 2021, þar sem maðurinn millifærði eða tók út fjármuni af reikning móður sinnar sem samtals nema 40,3 milljónum króna.

Móðir mannsins lést í desember árið 2018 en tæpum sex mánuðum síðar veiti Sýslumaður erfingjum heimild til einkaskipta og var ákærði skipaður umboðsmaður erfingjanna. Það gekk þó ekki betur en svo að dánarbúið var tekið til opinberra skipta með úrskurði Héraðsdóms Reykjavíkur í janúar 2022.

Þá er maðurinn einnig ákærður fyrir peningaþvætti með því að hafa nýtt 19 milljónir af áðurnefndum 40,3 milljónum með því að millifæra 5 milljónir inn á reikning dóttur sinnar, eins og áður segir, og 14 milljónir inn á eigin reikning.

Málið verður tekið fyrir í Héraðsdómi Reykjaness en þess er krafist að maðurinn verði dæmdur til refsingar og til greiðslu alls sakarkostnaðar.