Uppnám varð í flugvél á Keflavíkurflugvelli vegna konu sem heimtaði að sækja veski sem hún gleymdi í flughöfninni. Laug hún því að í veskinu væri vegabréf og lífsnauðsynleg lyf. Bróðir hennar skipti sér líka af með miklum látum. Gera þurfti öryggisúttekt á öllum farþegum eftir að þau voru farin frá borði.
Greint er frá málinu í miðlinum Twisted Sifter en frásögnin kemur upphaflega frá færslu á samfélagsmiðlum.
Um er að ræða flug frá Keflavík til ónefndrar borgar í Kanada á síðasta ári. Greinir einn farþeginn frá uppnámi sem átti sér stað þegar allir voru sestir og áhöfnin var að gera klárt fyrir brottför.
„Ég var í flugi frá Íslandi til Kanada og nokkrum mínútum fyrir brottför, beinlínis þegar flugfreyjurnar voru að fara yfir öryggisatriðin, stekkur ein stúlka upp úr sætinu sínu,“ segir farþeginn. „Hún truflaði eina flugfreyjuna og sagðist hafa gleymt veskinu sínu á flugvellinum og vegabréfið hennar væri í því. Spurðu hún hvort hún gæti ekki bara farið og náð í það. Hún var að ofanda.“
Sagði þá flugfreyjan stúlkunni að setjast niður og róa sig á meðan hún færi og léti aðra í áhöfninni vita af þessu. En þegar annar úr áhöfninni kom til að tala við stúlkuna þá hafði sagan skyndilega breyst. Sagðist stúlkan vera með vegabréfið sitt en í veskinu hennar væru lyfin hennar sem hún yrði nauðsynlega að fá.
„Svo varð þetta enn þá fáránlegra,“ segir farþeginn. Áhöfnin spurði stúlkuna hvers konar lyf þetta væru og kannski væru þau með slík lyf um borð fyrir hana. Þá reiddist hún og vildi ekki svara hvers kyns lyf væru í töskunni, sagði hún að það skipti ekki máli. Hún þyrfti að fá veskið sitt núna sama hvað og að hún hefði ekki tíma til að eiga þetta samtal.
Sendur var út hópur í Leifsstöð til að leita að veskinu á staðnum sem stúlkan talaði um en fann ekki neitt. Var stúlkan látin vita af þessu en þá fór bróðir hennar að skipta sér af. Stóð hann upp og öskraði á áhöfnina að hann gæti farið og leitað að veskinu.
Var bróðirinn látinn vita að það væri ekki hægt að leyfa honum að gera það þá rauk hann af stað og krafðist þess að fá að tala við flugstjórann. „Ég er flugstjóri sjálfur og veit hvað er mögulegt að gera,“ sagði bróðirinn með þjósti. Sagði hann að systir sín myndi ekki lifa flugið af án þess að fá lyfin sín.
Eftir 45 mínútur af uppnámi voru aðrir farþegar orðnir mjög þreyttir á þessu og fannst fólki að það ætti að hleypa systkinunum út. Var það loks gert og tóku þau handfarangurinn sinn með sér út.
Skömmu seinna lét flugstjórinn farþegana vita að systkinin hefðu verið rekin úr fluginu. Veskið hefði fundist en það hefðu ekki verið nein lyf í því.
Hins vegar þýddi þetta að vegna öryggis þurfti áhöfnin að fara yfir allan handfarangur í vélinni og staðfesta hvaða tösku eða poka hver og einn farþegi var með. Það er til þess að ganga úr skugga um að systkinin tvö hefðu ekki skilið neitt vafasamt eftir í vélinni. Í heildina þýddi þetta að flugið tafðist um klukkutíma eða þar um bil.
„Það var óþolandi að sjá hversu dónaleg þau voru við áhöfnina sem var kurteis og að þeim fannst allt í lagi að sólunda tíma annarra,“ segir farþeginn. „Þetta var stútfullt flug með börnum um borð. Hún vildi ábyggilega bara ekki tapa veskinu sínu og skáldaði þessa sögu til að einhver myndi fara og sækja það fyrir sig.“
