Svava Kristín Grétarsdóttir íþróttafréttakona á Stöð 2 hefur ákveðið að hætta störfum. Hún mun flytja til Vestmannaeyja og ætlar að einbeita sér að móðurhlutverkinu.

Svava Kristín greinir frá þessu í færslu á samfélagsmiðlum í dag.

„Þá er það upptalið af sporti frá mér að sinni, þangað til næst, hafið það sem allra best. Á þessum orðum endaði ég sportpakkana mína í kvöldfréttum Stöðvar 2 og í þetta skiptið eiga þessi orð vel við því ég hef unnið mína síðustu vakt á Stöð 2,“ segir hún í færslunni. „Það var ótrúlega erfitt fyrir mig að taka þessa ákvörðun, ég ætlaði mér alltaf að snúa aftur á skjáinn að fæðingarorlofi loknu. Þetta er eitthvað svo miklu meira og skemmtilegra en bara vinna.“

Í maí verða 10 ár síðan Svava Kristín las sinn fyrsta íþróttafréttatíma á Stöð 2, en hún hefur unnið hjá 365, Vodafone og Sýn mest allan sinn feril með stuttum stoppum hér og þar.

„Mér líður smá eins og ég sé að skrifa minningargrein, ég er svo sorgmædd en á sama tíma svo þakklát fyrir allan þennan tíma á Stöð 2. Þetta var drauma vinnan mín en í dag er ég að sinna drauma hlutverkinu, að vera mamma, einstæð móðir í Reykjavík með ekkert leikskólapláss og allt baklandið í Vestmannaeyjum. Það þýðir bara eitt, ég er á leiðinni heim,“ segir hún.

Að lokum segir Svava Kristín að hún stefni á að snúa aftur á skjáinn í einhverri mynd í framtíðinni. En hennar hefðbundna starf hjá Stöð 2 sé lokið.