Nýtt fyrirtæki, Jörfi ehf. pípulagna- og véltækniþjónusta, hefur tekið til starfa í nýju 550 fermetra húsnæði við Nesflóa 1, í Grænum iðngörðum á Akranesi. Jörfi veitir alhliða pípulagnaþjónustu ásamt véltæknilegri þjónustu og ráðgjöf til viðskiptavina. Fyrirtækið verður með starfsemi í þremur bilum í húsinu við Nesflóa, vélaverkstæði verður í einu og svo fagverslun fyrir iðnaðarmenn og fyrirtæki í tveimur bilum.

Verslunin er í samstarfi við Ísrör og Hringás og mun bjóða upp á breitt úrval af gæðaefni til innan- og utanhússlagna auk ýmissa sérlausna fyrir mannvirkja- og veitugeirann. Ísrör er birgir verslunarinnar hvað varðar allt efni til utanhússlagna en Hringás er helsti birgir Jörfa í innanhússlögnum, búnaði og sérlausnum, eins og segir í fréttatilkynningu.

Eigendur og forsvarsmenn Jörfa ehf. eru þrír: Óttar Þór Ágústsson, Bjarki Óskarsson og Einar Pálsson. Auk þeirra fer Merkjaklöpp samstæðan með eignarhlut í fyrirtækinu, en Merkjaklöpp hefur látið vel til sín taka við þróun og uppbyggingu Grænna iðngarða í Flóahverfi og á samstæðan orðið nokkuð af fasteignum á svæðinu.

„Við búum allir að mikilli reynslu á sviði pípulagna, vélvirkjunar og stálsmíði og ætlum okkur að byggja upp stórt og öflugt fyrirtæki á þessu sviði,“ segir Óttar Þór Ágústsson framkvæmdastjóri. „Við verðum með vélaverkstæði og munum selja vörur og þjónustu frá Hydroscand; glussafittings og slöngur í flestallar gerðir vinnuvéla. Þá munum við bjóða upp á alla almenna pípulagnaþjónustu, nýlagnir og viðhald, ásamt því að veita ráðgjöf til viðskiptavina um val á lögnum og búnaði. Einnig munum við taka að okkur samsetningar og viðgerðir á búnaði af öllum mögulegum stærðum og gerðum; sinna viðhaldi, sérhæfðri véltækniþjónustu, ástandsgreiningu, sérsmíði vélarhluta og þjónustu við dælur.“

Sjö manns starfa hjá Jörfa ehf. í byrjun en starfsfólki mun fjölga á næstu misserum að sögn eigendanna. „Við erum afar spennt að vera að byggja upp nýtt fyrirtæki og bjóða lausnir og vöruúrval í verslun sem ekki hefur verið til hér á svæðinu og gera þessa þjónustu þar með aðgengilegri á Akranesi og Vesturlandi öllu,“ segir Óttar Þór.