Ruud van Nistelrooy, stjóri Leicester, ku vera ósáttur með þau áhrif sem fyrirliði liðsins Jamie Vardy hefur á bæði stjórn félagsins og leikmenn liðsins.

Football Insider fjallar um málið en Van Nistelrooy tók við Leicester fyrr á tímabilinu og hefur gengið verið afskaplega slæmt undanfarnar vikur.

Vardy er goðsögn hjá Leicester og ber fyrirliðabandið en hann hefur spilað með félaginu frá árinu 2012.

Samband Vardy við eiganda Leicester, Aiyawatt Srivaddhanaprabha er talið mjög gott og samkvæmt fréttinni þá hlustar eigandinn meira á orð Vardy en það sem Van Nistelrooy hefur að segja.

Það er eitthvað sem Van Nistelrooy er talinn hafa áhyggjur af en hann mun líklega fá að stýra liðinu út tímabilið en óvíst er hvað gerist í sumar.

Að sama skapi þá líta flestir ef ekki allir leikmenn Leicester upp til Vardy sem varð 38 ára gamall á þessu ári en er enn í fullu fjöri í framlínunni.