Kokkurinn og veitingahúsaeigandinn Hrefna Sætran hefur selt hlut sinn í þremur veitingastöðum. Um er að ræða Grillmarkaðinn, Trattoria og Rauttvín. Þetta kemur fram í færslu Hrefnu á Facebook en þar segist hún ætla að einblína áfram á rekstur Fiskmarkaðarins, Uppi bar, Skúla Craft Bar og Kampavínsfjélagsins.

„Það er gott að breyta til og einfalda lífið. Ég finn sterkt að mín ástríða liggur í að að skapa framúrskarandi upplifun í mat og drykk og bjóða upp á gæðavörur þegar fólk heimsækir okkur. Þessi hugsun endurspeglast í öllu sem við gerum, hvort sem það er á veitingastaðnum, á barnum, í víninu eða á miðlunum okkar.
Þetta eru spennandi tímamót og ég spennt að halda áfram þeirri skemmtilegu vinnu sem við höfum verið í síðustu ár með öllu því skapandi fólki sem ég fæ að vinna með. Svo eru framundan ótrúlega spennandi verkefni í gangi hjá okkur sem ég hlakka til að segja ykkur frá. Nú er rétti tíminn til að setja mína krafta í það sem ég brenn fyrir. Búa til upplifanir og góðar stundir. Það er það sem gerir þetta skemmtilegt,“ segir Hrefna í færslunni.

Hrefna opnaði Grillmarkaðinn árið 2011 ásamt viðskiptafélögum sínum og hefur staðurinn verið síðan í hópi vinsælustu og farsælustu veitingahúsa landsins.