Thomsen, sem er 32 ára gamall, var á mála hjá portúgalska B-deildarliðinu Torreense fyrir áramót og gekk vel að sögn. Skyndilega tjáði félagið honum hins vegar að það hefði ekki lengur not fyrir danska framherjann.
„Þegar ég fór frá Íslandi þá var það ekki í plönunum að koma aftur, að minnsta kosti ekki sem knattspyrnumaður. Kærastan mín er héðan og því hugsuðum við að við myndum kannski koma aftur á endanum en ekki til þess að spila fótbolta,“ segir Thomsen, sem lék áður með KR og Val hér á landi við góðan orðstýr, í samtali við Morgunblaðið.
Thomsen segir að hann hafi viljað koma í Breiðablik um leið og hann heyrði af áhuga félagsins.
„Ég hef fylgst með deildinni frá því ég yfirgaf hana og veit hversu vel gekk á síðasta tímabili. Með allt sem tengist gengi íslenskra liða í Evrópukeppni í huga fannst mér þetta frábær tímapunktur til að snúa aftur og vera hluti af þessu.“
Það kom flatt upp á Thomsen þegar Torreense tjáði honum eftir tveggja vikna veikindi kappans að félagið vildi nota aðra leikmenn í hans stað.
„Ég kom mér aftur á skrið og skoraði gegn Benfica. Eftir það fór ég á fund með forsvarsmönnum félagsins og ég hélt að við myndum þá ræða hverju við höfðum áorkað. En þá sögðu þeir mér að þeir vildu fara aðra leið. Þeir vildu spila á öllum ungu leikmönnunum hvað sem á bjátaði og því myndi ég ekki spila meira á þessu tímabili. Það var mér auðvitað svolítið áfall því mér gekk mjög vel.“
Nánar er rætt við Thomsen í Morgunblaðinu.
