Kínverskur doktorsnemi í verkfræði, hinn 28 ára gamli Zhenhao Zou, var í dag fundinn sekur um að hafa byrlað og nauðgan tíu konum. Sky News sagði frá.

Zou tók upp myndskeið af flestum brotum sínum og því var auðvelt um vik að sanna á hann glæpinn eftir að myndefnið hafði fundist á heimili hans.

Dómurinn var kveðinn upp í London en Zou nauðgaði konunum í Kína og London á árabilinu 2019-2023. Tvær af konunum á myndböndunum skelfilegu hafa fundist en ekki hafa verið borin kennsl á átta. Þolendurnir eru tíu samtals en nauðganirnar sem Zou var fundinn sekur um voru 11 talsins, þrjár í London og sjö í Kína.

Breska lögreglan telur að Zou sé hugsanlega afkastamesti kynferðisbrotamaður Englands á síðari tímum, að því er segir í tilkynningu frá lögreglunni. Telur lögrelgn að 50 konur til viðbótar hafi lent í klónum á verkfræðinemanum illræmda. Talið er að Zou hafi nauðgað helmingnum af þessum konum í Kína og helmingnum í Englandi.

Kallar lögreglan eftir því að konur sem telja að Zhenhao Zou hafi brotið á sér gefi sig fram við lögreglu.

Í frétt Sky News segir að Zou hafi ekki sýnt nein tilfinningaviðbrögð þegar dómurinn var kveðinn upp yfir honum í dag. Saksóknari í málinu sagði við kviðdómendur, áður en þeir kváðu upp dóm sinn, að Zou virkaði sem snjall og hrífandi ungur maður en hann væri líka „kynferðislegt rándýr, gluggagægir og nauðgari.“

Zou vingaðist við konurnar á forritinu WeChat, sem og á stefnumótaforritum, bauð þeim til sín í íbúð sína í London, eða á ókunnan stað í Kína, bauð þeim upp á drykk og byrlaði þeim. Hann notaði síðan síma sinn og faldar myndavélar til að mynda brot sín gegn konunum, en þær voru oft meðvitundarlausar á meðan hann nauðgaði þeim.

Saksóknari hrósaði þeim hugrökku konum sem stigu fram og kærðu svívirðileg brot unga mannsins. „Zou er raðnauðgari og hættulegur konum,“ sagði saksóknarinn Saira Pike.

Sjá nánar á Sky News.