Vegna mataræðisins voru kólesteról gildi hans svo há að það byrjaði að seytla út úr húð hans.
Fjallað var um málið í læknariti þann 22. janúar síðastliðinn. Það er ekki greint frá nafni mannsins en hann býr í Flórída, er á fimmtugsaldri og var lagður inn á sjúkrahúsið í Tampa eftir að hafa verið með þessa gulu bletti á höndunum, undir iljunum og olnbogunum í þrjár vikur. Hann sagði að þetta væri ekki sársaukafullt en að honum þætti þetta frekar ógeðslegt.
Maðurinn sagði læknunum að átta mánuðum áður hafði hann byrjað að fylgja carnivore mataræðinu, sem snýst um að borða aðeins mat úr dýraríkinu: Kjöt, egg og mjólkurvörur.
Hann sagði að honum hafi liðið frábærlega á mataræðinu, verið orkumikill og tekist að losna við aukakíló. Hann var að borða um 2,7 til 4 kíló af osti á hverjum degi. Hann borðaði einnig mikið af hamborgarakjöti yfir daginn og smjör með.
Hann var greindur með Xanthelasma, eða fituútfellingar, og venjulega myndast þessir gulu blettir á augnlokum viðkomandi. Það kom því læknum á óvart að sjá blettina á höndum, iljum og olnbogum mannsins.
Ástandið orsakast af of háu kólesteróli, þegar kólesterólgildi eru svo há að það byrjar einfaldlega að ryðja sér út úr húðinni. Gildi hans voru um 3,5 til 4,5 sinnum hærri en þau áttu að vera.
Það er nokkuð einfalt að fjarlægja fituútfellingar en þær gefa samt sem áður til kynna undirliggjandi heilsuvanda sem gæti leitt til hjartasjúkdóms, hjartaáfalls og slags.
