Mikill meirihluti Íslendinga er andvígur því að Grænland verði hluti af Bandaríkjunum. Miðflokksmenn eru jákvæðastir gagnvart hugmyndinni.
Þetta kemur fram í nýrri könnun Gallup. Spurt var hvernig svarendum litist á það að Grænland yrði hluti af Bandaríkjunum. En að undanförnu hefur Donald Trump, Bandaríkjaforseti lýst því yfir að hann vilji að Bandaríkin yfirtaki Grænland og hefur ekki útilokað að beita hervaldi til að svo verði. Hefur þetta skapað mjög mikið róstur innan NATO enda hafa Bandaríkin og Danmörk hingað til verið bandamenn.
Langflestum svarendum líst illa á að Grænland verði hluti af Bandaríkjunum, eða 86,4 prósent. Þar af líst 80,2 prósentum mjög illa á hugmyndina.
8,2 prósent svöruðu hvorki né en aðeins 5,4 prósentum líst vel á hugmyndina. Þar af 1,3 prósent mjög vel.
Nokkur munur var á afstöðu þegar svörin voru greind eftir stjórnmálaskoðunum. Miðflokksmenn eru hrifnastir af hugmyndinni. 16 prósent þeirra styðja hana en 65 prósent eru á móti. Ekki langt á eftir eru Sjálfstæðismenn. Einnig eru 16 prósent Sjálfstæðismanna hrifnir af hugmynd Trump um yfirtöku á Grænlandi en 73 prósent Sjálfstæðismanna eru á móti.
6 prósent Framsóknarmanna eru hrifnir af yfirtöku Grænlands, 4 prósent kjósenda Flokks fólksins og 3 prósent Viðreisnarfólks.
Stuðningur við hugmyndina mældist ekki hjá neinum kjósendum Samfylkingar, Vinstri grænna, Pírata eða Sósíalistaflokks. Öllum svarendum Vinstri grænna lýst mjög illa á hugmyndina.
Þegar svörin voru greind niður eftir öðrum breytum sést að karlmenn eru hrifnari af hugmyndinni um yfirtöku Grænlands en konur, einkum yngri karlmenn.
9 prósent karla styðja yfirtöku Bandaríkjanna á Grænlandi, þar af 12 prósent karla á aldrinum 18 til 34 ára og 11 prósent karla á aldrinum 35 til 54 ára. Aðeins 1 prósent kvenna styðja hugmyndina og engin kona á aldrinum 35 til 54 ára.
Þá nýtur hugmyndin mun meiri stuðnings utan Reykjavíkur en í höfuðborginni. 3 prósent Reykvíkinga styðja hugmyndina en 7 prósent landsbyggðarfólks og íbúa í kraganum svokallaða, nágrannasveitarfélaga Reykjavíkur.
Gallup spurði einnig hvort að áhugi Bandaríkjamanna á Grænlandi og norðurslóðum sé tækifæri eða ógn fyrir Ísland. Svörin voru einnig afgerandi en þó ekki jafn afgerandi og við fyrri spurningunni.
73,8 prósent telja áhuga Trump vera ógn við Ísland, þar af 37,5 prósent mikla ógn. 12 prósent telja hann fela í sér tækifæri, þar af 4,2 prósent mikil tækifæri. 14,2 prósent svöruðu hvorki né.
Líkt og við fyrri spurningunni voru það einkum Miðflokksmenn og Sjálfstæðismenn sem svöruðu jákvætt. 32 prósent Miðflokksmanna telja tækifæri felast í áhuga Trump á Grænlandi og norðurslóðum sem og 30 prósent Sjálfstæðismanna.
Könnunin var netkönnun gerð dagana 7. til 17. febrúar. Úrtakið var 1.717 og svarhlutfallið 49,2 prósent.
