Hera Rún Ragnarsdóttir, leikkona, athafnakona og hlaðvarpsstjórnandi, og kærasti hennar, Hlynur, fögnuðu nýverið sex mánaða sambandsafmæli. Það mætti segja að ástarsaga þeirra sé aldeilis nútímaleg en þau kynntust á stefnumótaforriti og rifjar hún upp þeirra fyrsta stefnumót í Fókus.

Hera er gestur vikunnar í Fókus, spjallþætti DV. Brot úr þættinum má horfa á hér að neðan. Einnig er hægt að horfa á þáttinn í heild sinni hér eða hlusta á Spotify.

Hera var að koma úr þrettán ára löngu sambandi og finna sig upp á nýtt þegar ástin bankaði upp á. Hún viðurkennir að það hafi verið áhugaverð upplifun að byrja að deita aftur en stefnumótaheimurinn hafði breyst mikið frá því að hún var síðast einhleyp, eins og tilkoma stefnumótaforrita eins og Tinder og Smitten.

„Það var ógeðslega skrýtið,“ segir hún hlæjandi. Hún ákvað samt að prófa að skrá sig, sem aldeilis borgaði sig.

Hádegisverður í blómabúð

Parið kynntist á Smitten og rifjar Hera upp þeirra fyrsta stefnumót.

„Á þessum tíma átti ég blómabúð, sem hét Ísblóm. Við byrjuðum að spjalla og svo spurði hann hvort hann mætti koma og kíkja upp í búð með mat, svo við værum að hittast í smá hádegismat […] Inn labbar þessi fallegi maður og ég bara: Vá,“ segir Hera og hlær.

Þau fengu sér að borða og gekk allt eins og í sögu.

„Hann er með ótrúlega þægilega nærveru, smellum saman og allt flæðir rosalega vel,“ segir hún.

„Sama dag bauð hann mér á stefnumót og við fórum út að borða.“

Eftir það var ekki aftur snúið. „Við höfum ekki verið aðskilin síðan, þetta var bara match made in heaven,“ segir Hera brosandi.

Hún ræðir þetta nánar í spilaranum hér að ofan. Brotið er hluti af nýjasta þætti af Fókus sem má horfa á í heild sinni hér eða hlusta á Spotify og öllum helstu hlaðvarpsveitum.

Fylgdu Heru á Instagram og hlustaðu á hlaðvarp hennar, Á hærra plani, á Spotify.