Í frétt RÚV, þar sem fjallað er um fimmta þáttinn í hlaðvarpsþáttaröðinni, kemur fram að sögusagnir hafi gengið í íslenska pókerheiminum þess efnis að ráðist hefði verið á Jón, hann drepinn og grafinn. Rúmu ári síðar hafi ákveðið nafn komið upp á yfirborðið.
Sjá einnig: Jón Þröstur var að undirbúa sig fyrir spennandi kafla í lífi sínu þegar hann hvarf skyndilega
Í þættinum er maðurinn sem um ræðir kallaður Alex og mun einstaklingur sem tengist undirheimunum hafa sett sig í samband við hálfbróður Jóns Þrastar.
„Það var hringt í mig og í símanum var maður sem sagðist hafa upplýsingar um hvað komið hefði fyrir Jón. Ég spurði hverjar þær væru og hann sagði að það væri maður sem hefði fengið það verkefni að ganga frá íslenskum manni, myrða hann, sem hann og gerði,“ segir Gunnar sem er hálfbróðir Jóns í þættinum samkvæmt frétt RÚV. Vandamálið hafi þó verið að rangur maður var drepinn.
Þá kemur fram í þættinum að Anna Hildur, systir Jóns Þrastar, hafi fengið heimsókn frá manni sem kvaðst hafa verið að ræða við kunningja sinn. Þessi kunningi mannsins hafi fengið undarlegt símtal frá einstaklingi nákomnum Alex. Sá hafi sjálfur fengið símtal frá Alex skömmu eftir hvarf Jóns Þrastar og Alex verið í miklu uppnámi því hann hafi drepið rangan mann.
„Hann hafi átt að myrða einhvern, en hann myrti rangan mann og það var bróðir minn,“ segir Anna Hildur.
Nánar má lesa um málið á vef RÚV en einnig er hægt að nálgast þættina á öllum helstu hlaðvarpsveitum.
