Viðreisn lætur ekki hanka sig á því að efna til samstarfs við Sósíalista og Vinstri græna í borgarstjórn Reykjavíkur. Þetta er klókt hjá flokknum því að Viðreisn er frjálslyndur miðjuflokkur og verður að haga ákvörðunum sínum í samræmi við það. Það gerir flokkurinn með því að standa fyrir utan hið væntanlega samstarf vinstri flokka í Reykjavíkurborg.
Orðið á götunni er að í þessu geti falist mikil klókindi fyrir Viðreisn. Verði vinstri meirihlutinn myndaður í Reykjavík verður Viðreisn í minnihluta með Sjálfstæðisflokki og Framsókn í langmikilvægasta sveitarfélagi landsins án þess að það trufli farsælt samstarf flokksins við Samfylkinguna og Flokk fólksins á vettvangi ríkisstjórnarinnar. Það ber ekki allt upp á sama daginn í stjórnmálum og gott er fyrir Viðreisn að geta komið að samstarfi við ýmsa flokka án þess að ganga svo langt að vinna með kommum – eins og varð Bjarna Benediktssyni og fráfarandi forystu Sjálfstæðisflokksins að falli.
Ljóst er að Einar Þorsteinsson réð ekki við starf borgarstjóra og því fór sem fór. Framsóknarflokkurinn er rúinn trausti bæði á landsvísu og í borginni. Hann mun ekki eiga möguleika á að rísa úr öskustónni fyrr en núverandi formaður fer af vettvangi rétt eins og Einar Þorsteinsson, sem er birtingarmynd einnar misheppnuðustu tilraunar seinni ára til að dubba upp stjórnmálamann úr öðrum flokki og öðrum störfum með hraði.
Orðið á götunni er að þeir fimm flokkar sem nú virðast vera að mynda meirihluta í borginni verði sammála um að Heiða Björk Hilmisdóttir verði borgarstjóri ef niðurstaðan verður sú að velja borgarstjóra úr hópi kjörinna fulltrúa. Allt annað væri galið. Samfylkingin er með fimm borgarstjórnarfulltrúa, aðrir þrjá, tvo eða einn. Hinn möguleikinn er að velja faglegan utanaðkomandi og tiltölulega ópólitískan borgarstjóra til 15 mánaða. Hvar skyldi hann nú finnast? Ja, hugsanlega væri hægt að fá rekstrarráðgjafa til að taka að sér verkefnið.
Ekki þarf að gera ráð fyrir því að yfirstandandi hræringar í borgarstjórn hafi nein áhrif á samstarf ríkisstjórnarflokkanna þriggja. Að vissu marki er það léttir að losna við borgarstjóra á vegum Framsóknarflokksins, fyrrverandi formann ungra sjálfstæðismanna í Kópavogi. Viðreisn verður fyrir utan og heldur kúlinu og verður opin í allar áttir.
Hitt er svo ljóst að þær vendingar sem hafa orðið í borgarstjórn hafa afhjúpað getuleysi borgarfulltrúanna 23 og minna á það brýna verkefni að fækka þeim að nýju niður í 15.
Orðið á götunni er að flestir helstu flokkar sem nú eiga fulltrúa í borgarstjórn Reykjavíkur muni trúlega endurnýja forystuframboð sín með afgerandi hætti. Það gæti átt við Sjálfstæðisflokkinn, Viðreisn, Framsókn, Flokk fólksins og jafnvel fleiri. Og Miðflokkurinn hlýtur að banka að nýju.
