Franska blaðið Le Parisien segir að þetta hafi maðurinn gert í bræði eftir að hafa tapað og lent í orðaskaki við andstæðinga sína í tölvuleiknum vinsæla Fortnite.
Ungi maðurinn er sagður hafa játað á sig morðið sem átti sér stað í Essonne, suður af París, þann 7. febrúar síðastliðinn.
Franskir fjölmiðlar hafa eftir Gregoire Dulin, saksóknara í málinu, að ungi maðurinn hafi haft það orð á sér að missa stjórn á skapi sínu í tölvuleikjum. „Hann vildi stela einhverju eða kúga einhvern til að róa sig niður,“ segir Dulin.
Hann er sagður hafa farið út eftir tapið í tölvuleiknum og komið þá auga á hina ellefu ára gömlu Louise Lasalle sem var á gangi með farsíma í bandi um hálsinn.
Owen er sagður hafa ætlað að ræna símanum af stúlkunni en Louise brást við með því að öskra og berjast um. Er Owen sagður hafa brugðist við með því að stinga stúlkuna ítrekað með þeim afleiðingum að hún lést af sárum sínum.
Lík Louise fannst daginn eftir en lögregla hafði hendur í hári unga mannsins eftir að hafa farið í gegnum myndefni á eftirlitsmyndavélum í nágrenninu.
Í frétt Le Parisien kemur fram að hinn grunaði í málinu búi með efnuðum foreldrum sínum, en faðir hans er hátt settur bankastarfsmaður. Kærasta Owens hefur einnig verið handtekin en hún er sögð hafa vitað hvað gerðist þennan örlagaríka dag þegar kærasti hennar kom blóðugur heim.
