Erlendur maður, búsettur á Íslandi, hlaut tveggja mánaða skilorðsbundinn dóm fyrir að hlýða ekki fyrirmælum lögreglu í landgangi á Keflavíkurflugvelli og kýla lögreglumann í andlitið.

Atvikið átti sér stað í landgangi flugstöðvarinnar föstudaginn 22. desember árið 2023. Stöðvaði lögregla manninn og bað hann að fylgja sér en hann hlýddi ekki þrátt fyrir ítrekuð tilmæli.

Féll hann og þegar lögreglumaður var að reisa hann við kýldi hann lögreglumanninn í andlitið með þeim afleiðingum að hann fékk eymsli á kinnbeinið. Annar lögreglumaður greip hann og hélt honum en maðurinn reyndi þá að skalla hann.

Var maðurinn ákærður fyrir brot gegn lögreglulögum og brot gegn valdstjórninni og þess krafist að hann yrði dæmdur til refsingar og greiðslu alls sakarkostnaðar.

Sjá einnig:

Sauð upp úr í Flugstöð Leifs Eiríkssonar – Ákærður fyrir árásir á lögreglumenn

Játaði maðurinn framferði sitt og var málið því tekið til dóms án frekari sönnunarfærslu. En auk játningar höfðu verið lagðar fram myndbandsupptökur úr búkmyndavélum lögreglumannanna.

Þótti hæfileg refsing tveggja mánaða skilorðsbundið fangelsi til tveggja ára. Auk þess var honum gert að greiða verjanda sínum 267.840 krónur í málsvarnarþóknun.