„Ég er alltaf á þeirri skoðun að láta flugþjónana um málið þegar kemur að erfiðum aðstæðum í flugi,“ sagði Nicole Campoy Jackson ferðasérfræðingur, rithöfundur og ráðgjafi hjá Fora Travel aðspurð um þau atvik þegar farþegar vilja setjast í annað sæti en brottfararspjald þeirra segir til um. Og þannig jafnvel reka þann sem á sætið í burtu.

 „Spennan er mikil þegar við erum að ferðast og þeir vita til dæmis hvort það er annað sæti laust eða hvort má finna aðra lausn á þessu vandamáli. Þeir hafa meiri upplýsingar en við farþegarnir.“

Sjá einnig: Flugfarþegi „stal“ ítrekað öðru sæti – Vildi ekki sitja hjá eiginmanninum

„Að skipta um sæti snýst alltaf um sveigjanleika, skilning og góðvild samfarþega okkar. Það byrjar með einfaldri kurteisri spurningu um hvort viðkomandi vilji skiptast á sæti. Það snýst auðvitað líka um hvað er hægt innan reglna flugfélagsins, öryggi hvar allir þurfa að vera á tilteknum tíma og hvað hefur verið greitt fyrir,“ segir Jackson við People.

Hún deildi líka skoðunum sínum á því hvort það væri ásættanlegt að farþegar spili tónlist eða myndbönd upphátt um borð, það er notist ekki við heyrnartól.

„Algjörlega ekki. Það er ekki sniðugt að gera ráð fyrir að öllum í kringum þig langi til að horfa eða hlusta á það sem þú ert að horfa eða hlusta á. Þetta snýst bara um að taka smá stund í að hugsa um fólkið sem er í kringum þig. Heyrnartól eru til í barna- og fullorðinsstærðum og það er ekki erfitt að útvega þau – þau eru meira að segja til sölu á öllum flugvöllum.“