Karl Steinar Valsson yfirlögregluþjónn telur ólíklegt að Jón Þröstur Jónsson, sem hvar í Dyflinni á Írlandi í febrúar árið 2019, hafi fyrirfarið sér. Segir hann engar vísbendingar vera um að Jóm Þröstur hafi viljað skaða sig.
Þetta kemur fram í frétt á RÚV sem unnin er upp úr hlaðvarpi um hvarf Jóns Þrastar.
Karl Steinar fór fyrir sendinefnd íslensku lögreglunnar sem fór til fundar við kollega sína á Írlandi í kjölfar hvarfs Jóns Þrastar. „Þeim fannst líklegast að Jón hefði gengið í sjóinn. Þess vegna ákváðu þeir að hætta meira eða minna eftirgrennslan, nema ef eitthvað nýtt ræki á fjörur þeirra. Þannig var staðan á þessum tímapunkti,“ segir Karl Steinar í hlaðvarpinu.
Karl Steinar telur að Jón Þröstur hafi annaðhvort látið sig hverfa eða honum hafi verið ráðinn bani. Hann telur ólíklegt að hann hafi fyrirfarið sér en þó ekki útilokað.
„En tilfinning mín sem lögreglumaður er að ekkert bendi til að hann hafi skaðað sjálfan sig. Það er auðvitað möguleiki, það er aldrei hægt að þvertaka fyrir slíkt. En ég myndi frekar vilja segja að annað En ég myndi frekar segja að annað hvort gerði einhver Jóni eitthvað, eða að hann kaus að láta sig hverfa,“ segir Karl Steinar.
Í viðtali sem DV tók við móður Jóns Þrastar, Hönnu Björk Þrastardóttur, nokkrum mánuðum eftir hvarf hans, hallaðist hún að því að hann hefði tekið eigið líf.
„Auðvitað veit ég þetta ekki fyrir víst en ég get þó sagt að í hjarta mér veit ég hvað gerðist en ég get ekki sannað það. Staðreyndirnar tala líka sínu máli. Hann var með peninga á sér og greiðslukort en greiðslukortin hafa ekki verið hreyfð síðan. Þetta var um hábjartan dag og það voru margir á ferli í borginni. Hann þekkti engan þarna. Ég held að enginn hafi unnið honum mein. Það er sagt að hann hafi verið með mikla peninga á sér, það liggur reyndar ekkert fyrir um það, en hafi svo verið þá vissi enginn um það og var ekki ástæða til að ráðast á hann. Hann Jón minn var stór og stæðilegur og hann var ekki að fara að láta neinn yfirbuga sig upp úr þurru úti á götu. En ég held líka að hann sé ekki á meðal okkar lengur og að hann hafi tekið hræðilega ákvörðun,“ sagði Hanna Björk í þessu viðtali.
