Ange Postecoglou, stjóri Tottenham, segir það rangt að Mathys Tel, sem gekk í raðir félagsins á dögunum, hafi upphaflega hafnað því að koma.

Tel, sem er 19 ára gamall sóknarmaður, kom til Totttenham á gluggadeginum á láni frá Bayern Munchen út leiktíðina. Enska félagið getur svo keypt hann í sumar á 46 milljónir punda.

Aðeins nokkrum dögum áður en Tel gekk í raðir Tottenham var mikið fjallað um að hann hafi hafnað því að ganga í raðir félagsins, þrátt fyrir að það hafi náð samkomulagi við Bayern.

„Fólk þarf að skilja að við erum að tala um 19 ára gamlan strák sem var að taka stóra ákvörðun fyrir feril sinn. Hann hafnaði okkur ekki frekar en neinum öðrum. Hann vildi bara vera öruggur í sinni ákvörðun,“ segir Postecoglou hins vegar.

„Ég er viss um að hugur hans er 100 prósent á verkefninu hér því hann tók sér tíma í að taka ákvörðun. Hann hafði aðra kosti svo það sannfærir mig að hann hafi valið að koma hingað.“

Tottenham hefur átt skelfilegt tímabil hingað til, er í 14. sæti ensku úrvalsdeildarinnar, 10 stigum fyrir ofan fallsvæðið.