Magnús Kjartan Eyjólfsson, tónlistarmaður og aðalsöngvari Stuðlabandsins, greindist með bráðaeitilfrumuhvítblæði fyrir tæpu ári, laugardaginn 17. febrúar.
Unnusta hans, Sigríður Jónsdóttir, sagði þau þakklát fyrir að meinið hafi greinst á byrjunarstigi, en ljóst væri að framundan væri nýr veruleiki og stærsta verkefni fjölskyldunnar til þessa.
Sjá einnig: Magnús Kjartan greindur með hvítblæði – „Við finnum stuðninginn og tökum þessu verkefni af fullum þunga“
Magnús Kjartan hefur verið opinskár með veikindi sín og er einn þeirra sem segir sögu sína í árlegu fjáröflunar- og vitundarátaki Krafts. Markmið átaksins er að vekja athygli á mikilvægi starfsemi Krafts og veita fólki innsýn inn í þær áskoranir sem fylgja því að greinast ungur með krabbamein eða vera aðstandandi, en um 70 ungir einstaklingar greinast á ári hverju hér á landi.
Magnús var fertugur ósköp venjulegur fjölskyldufaðir með fjögur börn og voru þau hjónin nýbúin að taka fimmta barnið að sér í fóstur þegar hann greindist.
„Ég var bara að fara að gera mig kláran í vinnudag, ég ætlaði að fara að spila á balli á laugardagskvöldi. Vakna með einhverja svarta bletti á tungunni sem ég ákvað að láta kíkja á og fæ þá skýringu að ég sé með hvítblæði,“ segir Magnús.
Hann segist hafa ætlað að halda sig við að mæta í vinnuna um kvöldið, en læknirinn á vakt sagt að hann þyrfti að fá annan til að mæta. Magnús var sama kvöld lagður inn á krabbameinsdeildina á Landspítalanum.
„Þegar maður fær þetta verkefni í hendurnar að greinast með krabbamein, og þegar ég segi ég þá vil ég frekar meina við fjölskyldan. Þó það sé vissulega bara ég sem greinist með krabbamein líkamlega þá er í rauninni fjölskyldan öll að greinast með krabbamein.“
Kraftur bauð Magnúsi í kaffi og spjall. Segist hann til dæmis ekki hafa haft hugmynd um að hann gæti fengið lyfjakort svo hann þyrfti ekki að leggja háar fjárhæðir fram fyrir lyfjum.
„Svo komu þau mér í skilning um að ég væri ekki einn, ég gæti alltaf leitað þangað. Maður getur mætt og talað við fólk á jafningjagrundvelli, fólk sem veit hvernig þér líður hvað þú ert að ganga í gegnum.
Ef þið sjáið fyrir ykkur teiknaða mynd af manneskju og skugga og skugginn er ekki að gera það sama og manneskjan vill gera. Ég myndi lýsa krabbameini akkúrat þannig,“ segir Magnús.
„Nú er staðan hjá mér þannig, ég get orðað það þannig að skuggamyndin er að dofna og er kannski farin að gera meira það sem ég vil að hún geri.“
Í dag er Magnús í viðhaldsmeðferð og verður í henni næstu tvö árin ef ekkert breytist.
„Ég ætla svo sannarlega að vona að ekkert breytist og ég hef fulla trú á því að skugginn hverfi aldrei en fari bara að gera það sama og ég.“
Þegar hann er spurður að því hvaða þýðingu „Lífið er núna“ hafi fyrir hann, segir hann:
„Lífið er núna hefur mismunandi meiningu fyrir mér á hverjum einasta degi. Ég myndi segja að það sem kemur sterkast upp í hugann er: Notaðu tímann sem þú hefur, þú veist aldrei hvað hann er langur“.
Yfirskrift fjáröflunar- og vitundarvakningar Krafts í ár er Ég á lítinn skrítinn skugga – Lífið er núna og vísar til þeirra langtímaáhrifa sem það hefur að greinast ungur með krabbamein, ekki bara á þann sem greinist heldur einnig á aðstandendur. Hvort sem við höfum greinst með krabbamein, einhver okkur nákominn eða við orðið fyrir öðrum áföllum á lífsleiðinni, þá eigum við öll okkar skugga sem er alltaf til staðar. Stundum er skugginn stór, stundum verður hann að daufum útlínum og stundum hverfur hann alveg undir skósólana. En skugginn er alltaf til staðar. Hann er þögull ferðafélagi og partur af lífi okkar allra.
Sjá einnig: „Ég á lítinn skrítinn skugga – Lífið er núna“
