Breska verslunarkeðjan Iceland kynnti stórundarlega nýung í verslunum sínum. Innkaupakerrur og körfur sem hjálpa fólki við líkamsrækt.

Annars vegar er um að ræða innkaupakerru á sleða sem vegur alls 25 kílógrömm. Eins og gefur að skilja er erfiðara að keyra hana um verslunina en venjulega búðarkerru.

Hins vegar er um að ræða innkaupakörfu með áföstum lóðum. Vegur hún heil 15 kílógrömm.

Ástæðan fyrir því að forsvarsmenn Iceland ákváðu að búa þetta til var könnun sem þeir létu gera sem sýndi að 37 prósent Breta setja sér markmið í líkamsrækt á hverju ári. Þar af sögðust meira en helmingur, 56 prósent, myndu stunda líkamsrækt í búðarferðum ef það væri boðið upp á það.

„Raunveruleikinn er sá að flest fólk hefur ekki tíma til að fara í ræktina eða hefur ekki áhuga á því,“ sagði Paul Dhaliwal, yfirmaður hjá Iceland Foods. „Þess vegna höfum við blandað saman matarinnkaupum og líkamsrækt og ætlum ða hlusta á hvað viðskiptavinirnir segja um þetta. Þetta gæti breytt því hvernig við verslum í matinn til framtíðar.“