Það vakti athygli einhverra í vikunni að þegar Kristján Oddur Kristjánsson, 17 ára gamall leikmaður, var kynntur til leiks hjá Val var Gylfi Þór Sigurðsson með honum á myndinni sem þar fylgdi.

„Er það yfirlýsing hjá þeim að hafa Gylfa Sig með honum á myndinni?“ spurði Helgi Fannar Sigurðsson, þáttastjórnandi Íþróttavikunnar á 433.is í nýjasta þættinum og átti þar við að svo gæti verið vegna orðróma um hugsanlega brottför Gylfa frá Hlíðarenda í vetur. Þessi besti landsliðsmaður sögunnar hefur verið orðaður við Víking.

„Ég skil alveg pælinguna. Sýna að hann sé með þeim í þessari vegferð sem þeir eru á, að hann sé tilbúinn að mæta og peppa ungan strák sem er að skrifa undir,“ sagði Hrafnkell Freyr Ágústsson þá.

Hann telur jafnframt afar ólíklegt úr þessu að Gylfi, sem kom heim og gekk í raðir Vals í fyrra, yfirgefi félagið.

„Ég held að Gylfi sé bara að fara að vera áfram í Val og endi svo í einhverju starfi þarna ef hann hefur áhuga á því,“ sagði hann.