Eins og komið hefur fram hefur Donald Trump, sem tók við völdum í Hvíta húsinu á mánudag, ekki beðið boðanna og gefið út fjölda tilskipana um ýmis mál.
Ein snýr til dæmis að því að alríki Bandaríkjanna viðurkenni bara tvö kyn, karla og konur, og önnur snýr að útrýmingu hinnar svokölluðu DEI-stefnu úr bandarísku stjórnkerfi.
Bjarndís sagði í fréttum RÚV að tilskipun Trumps ógni bæði félagslegu og lagalegu öryggi hinsegin fólks. Gera samtökin ráð fyrir að fólk sem er trans eða sýnilega hinsegin verði fyrir auknu áreiti.
„Mikið af því sem við sjáum hérna á Íslandi í umræðunni kemur frá Bandaríkjunum og þessi tilskipun Trumps er mjög alvarleg, gefur leyfi fyrir hatri og fordómum og ég held að okkur sé ekki greiði gerður með því að láta eins og við séum algjörlega aftengd frá þeirri umræðu sem er í gangi vestan hafs,“ sagði Bjarndís.
Þá hafi samtökin fengið margar fyrirspurnir frá hinsegin samfélaginu í Bandaríkjunum frá fólki sem vill kanna möguleikann á því að flytja til Íslands. Segir Bjarndís að samtökin aðstoði eftir fremsta megni þá sem leitra til þeirra.
Kallar Bjarndís eftir því að ríkisstjórn Íslands taki skýra afstöðu í samræmi við þá utanríkisstefnu sem er á Íslandi og snýr meðal annars að mannréttindum hinsegin fólks.
