Þetta kemur fram í fréttatilkynningu frá Kaupmannahafnarháskóla.
Krabbamein í brisi er ein banvænasta tegund krabbameins. Hjá körlum eru 12% líkur á að þeir séu á lífi 5 árum eftir að þeir greinast með krabbameinið og hjá konum eru líkurnar 14%.
Einkenni krabbameinsins eru óljós og koma oft ekki fram fyrir en löngu eftir að krabbameinið skýtur rótum í líkamanum.
Danskir vísindamenn nýttu sér þróaða krabbameinsmeðferð við öðrum tegundum krabbameins sem grunn að nýrri aðferð.
Lars Henning Engelholm, einn af vísindamönnunum á bak við rannsóknina, segir að litlar framfarir hafi orðið í meðferð við briskrabbameini síðustu 20 árin en nýja rannsóknin lofi góðu. Nýju lyfi er beitt í henni en það getur barist við krabbameinið á fleiri vegu en áður. Lyfið drepur krabbameinsfrumurnar beint sem og stuðningsfrumur þeirra en þær notar krabbameinið til að stækka og vernda sig.
Þegar lyfið nær til stuðningsfrumanna, losnar um eiturefni sem geta drepið nærstaddar krabbameinsfrumur. Uppbygging æxlisins veikist um leið og þannig verður auðveldara fyrir ónæmiskerfi líkamans að ráðast á það og glíma við.
