Víkingur mun spila heimaleik sinn gegn Panathinaikos í Sambandsdeildinni í Helsinki í Finnlandi, líkt og hefur verið í umræðunni undanfarna daga.
Liðin mætast í umspili um sæti í 16-liða úrslitum, en Víkingur er kominn á þetta stig keppninnar eftir frábæran árangur í deildarkeppninni fyrir áramót. Þá lék Víkingur á Kópavogsvelli á undanþágu en fékk hana ekki áfram frá UEFA.
Fyrri leikurinn, heimaleikur Víkings, fer fram á Bolt Arena í Helsinki þann 13. febrúar. Tekur hann um 10 þúsund manns. Seinni leikurinn fer fram í Grikklandi viku síðar.
Tilkynning Víkings
Kæru EuroVikes. Loksins loksins loksins getum við staðfest að heimaleikur okkar gegn Panathinaikos í umspili Sambandsdeildar Evrópu fer fram fimmtudaginn 13.febrúar næstkomandi á Bolt Arena í Helsinki. Völlurinn tekur rúmlega 10.000 áhorfendur og gert er ráð fyrir ca. 800 aðdáendum Panathinaikos.
Þar sem um heimaleik okkar er að ræða þá er mikilvægt að strákarnir fái allan þann stuðning sem mögulegur er og því hvetjum við alla Víkinga sem það mögulega geta að koma með og styðja liðið.
Knattspyrnudeild Víkings er gríðarlega þakklát HJK Helsinki og öðrum félögum sem gerðu sitt besta til að aðstoða okkur og við hlökkum til að búa til fleiri EuroVikes augnablik með ykkur þegar við skrifum næsta kafla í sögunni.
En að því mikilvægasta. Það er stutt í leikdag og í samstarfi við Icelandair er verið reyna að útbúa ferð á leikinn. Við hvetjum því alla sem hafa áhuga á að koma með til Finnlands að skrá sig hér að neðan. Skráning er ekki bindandi en við myndum nota fjöldann sem skráir sig til að vinna málið áfram. Athugið! Ef þú ert 100% ákveðinn í að fara þá mælum við með að bóka flug og gistingu við allra fyrsta tækifæri á eigin vegum. Það er ekki 100% öruggt að þessi ferð sem við erum að reyna að útbúa gangi eftir, en því fyrr sem við afhendum Icelandair áætlaðan fjölda því fyrr er hægt að framleiða ferð.
Kæru Víkingar. Við höfum staðið frammi fyrir stærri og erfiðari áskorunum en að styðja EuroVikes í umspili um sæti í 16 liða úrslitum Sambandsdeildar Evrópu. Tökum yfir Helsinki saman! KOMA SVO
