Sigríður Á. Andersen, þingmaður Miðflokksins og fyrrverandi dómsmálaráðherra Sjálfstæðisflokksins, varð á sunnudag Íslandsmeistari í bekkpressu á Íslandsmóti Kraftlyftingasambands Íslands.

„Við mættum stór hópur frá Kraftlyftingafélagi Reykjavíkur. Sumir kepptu bæði í klassískri bekkpressu og skelltu sér svo í búnað eftir hádegi. Mörg persónuleg met voru slegin og sex Íslandsmethafar í klassíska hópnum okkar, þ.á m. ég. Mér tókst að slá rúmlega ársgamalt Íslandsmet sem stóð í 66,5 kg,“ segir Sigríður í færslu á Facebook.

Segist hún hafa haft áhyggjur þar sem hún mætti kvöldinu áður á þorrablót KR. „Ég hafði í morgun áhyggjur af hálfu kílói eða svo af súrmat sem ég torgaði á þorrablóti KR (Vesturbæjar) í gærkvöld. Það kom þó ekki að sök er ég steig á vigtina á Íslandsmóti Kraftlyftingasambandsins kl. 8 í morgun. Ég missti ekki keppnisréttinn á Íslandsmótinu í klassískri bekkpressu sem fór fram í dag, eins og ég hafði óttast.“

Lyfti hún fyrst 62,5 kílóum, því næst 65 kílóum „sem ég hafði gert á innanfélagsmóti á kjördag og var mitt persónulega met. Bætti svo Íslandsmetið um hálft kíló. Það stendur því í 67 kg þar til þið sláið það, eða ég.“

Sigríður segir mótið sem haldið var af Breiðabliki hafa verið það fjölmennasta hingað til, ungir og aldnir hafi mætt og keppt.

„Sumir kepptu bæði í klassískri bekkpressu og skelltu sér svo í búnað eftir hádegi. Mörg persónuleg met voru slegin og sex Íslandsmethafar í klassíska hópnum okkar, þ.á m. ég. Mér tókst að slá rúmlega ársgamalt Íslandsmet sem stóð í 66,5 kg. Sumum æfingafélaga minna þótti ekki nóg að slá Íslandsmet einu sinni á mótinu heldur bættu eigin Íslandsmet. Það er kraftur í þessum konum í KFR.“