Söng- og leikkonan Mandy Moore hefur fengið yfir sig harða gagnrýni eftir að hún deildi söfnun í þágu fjölskyldumeðlima sem misstu heimili sitt í eldunum í Los Angeles.

Moore deildi á föstudag GoFundMe söfnun fyrir tengdabróður og svilkonu á Instagram-síðu sinni og hvatti fólk til að styrkja þau.

„Þar sem von er á frumburði þeirra eftir öfráar vikur þurfa þau stuðning okkar meira en nokkru sinni áður. Griff er tónlistarmaður á tónleikaferðalagi sem missti allan búnaðinn sinn, trommur og slagverk, sem hann notar sér til tekjuöflunar. Þetta er bara svo yfirþyrmandi. Svo mörg hafa spurt hvernig þau geti hjálpað á þessum ólýsanlega álagstíma. Gerið það íhugið að styrkja og deilið söfnunninni til að hjálpa þeim að koma fótunum aftur undir sig.“

Þessi færsla Moore vakti hörð viðbrögð. Margir bentu á að leikkonan ætti nóg af peningum. Gat hún ekki bara styrkt þau sjálf í stað þess að biðja efnaminni fylgjendur sína um ölmusu? Moore er metin á milljarða.

Þá bætti Moore við færslu sína og vísaði gagnrýninni til föðurhúsanna.

„Fólk sem er að efast um það hvort við séum að hjálpa okkar eigin fjölskyldu eða vísa í einhverja handahófskennda fjárhæð sem Google segir að einhver eigi er EKKI hjálplegt og laust við samkennd. Auðvitað erum við að hjálpa. Félagi okkar Matt efndi til söfnunarinnar og ég er að deila henni því fólk hefur spurt hvernig það geti hjálpað þeim.“

Moore bætti við að hún hefði sjálf misst mikið í eldunum. Hún missti þó ekki heimili sitt en bílskúrinn, stúdíó og bakhús.

„Við misstum líka mestallt okkar í eldunum. Svo vinsamlegast fokkið ykkur. Enginn er að þvinga ykkur til eins né neins.“

Eftir að tæplega 30 milljónir höfðu safnast ákvað skipuleggjandi söfnunarinnar að loka fyrir frekari styrki.

Leikkonan segir í annarri færslu:

„Til að vera hreinskilin þá er ég í áfalli og bara dofin út af öllu því sem fólk hefur misst, þar með talið fjölskylda mín. Skóli barna minna er farinn. Uppáhalds veitingastaðir okkar eru rjúkandi rústir. Svo margir vinir og ástvinir hafa misst allt. Samfélagið okkar er brotið en við munum byggja það upp saman að nýju. Ég sendi ást til allra sem hafa orðið fyrir barðinu á eldunum og til þeirra í framlínunni sem vinna að því að ná tökum á eldunum.“